80-годдзю вызвалення Беларусі прысвячаецца

11 красавіка Клічаў прыме ўдзельнікаў агульнарэспубліканскай акцыі «Разам з мастацтвам», якая прымеркавана да святкавання 80-годдзя вызвалення Беларусі ад нямецка-фашысцкіх захопнікаў. Акцыя стартавала ў Мінску, пройдзе ў 33-х рэгіёнах Беларусі. Назва яе невыпадковая, бо яе праводзіць Маладзёжны тэатр эстрады пры падтрымцы Міністэрства культуры.
«Асноўная мэта праекта – паказаць уклад дзеячаў мастацтва ў вызваленне СССР. Бо сіла мастацтва вялікая: песні, вершы натхнялі нашых воінаў на перамогу», – адзначае мастацкі кіраўнік тэатра і праекта Аляксандр ДАЛЖЭЎСКІ.

Клічаўляне ўносяць у акцыю свой важкі ўклад. У прыватнасці, на пляцоўцы перад раённым Домам культуры будзе прадстаўлена экспазіцыя «Партызанскі лагер» з работай тэматычных партызанскіх пляцовак. У фае РДК будзе працягнута тэма вайны з прэзентацыяй макета спаленых вёсак Клічаўскага раёна, работы ваенна-патрыятычных клубаў, «Школы Міра», выстаўкі дзіцячых малюнкаў.

Пачатак усіх мерапрыемстваў на цэнтральнай плошчы Клічава ў 15.00.
Канцэрт з удзелам зорак беларускай эстрады адбудзецца ў раённым Доме культуры, пачнецца ў 16.00. Уваход свабодны.

Каб шумелі лясы

Больш за 5 гектараў маладога лесу пасаджана на Клічаўшчыне ў рамках сёлетняй рэспубліканскай акцыі «Аднавім лясы разам!». Як расказала намеснік кіраўніка па ідэалагічнай рабоце Клічаўскага лясгаса Святлана ЧАРЭЙЧЫК, сёлета жыхары раёна праяўляюць вялікую актыўнасць у акцыі. У ёй ужо прынялі ўдзел прадстаўнікі райвыканкама, дэпутацкага корпуса, РАУС, райваенкамата, раёна газазабеспячэння, раённай ветэранскай арганізацыі, настаўнікі і навучэнцы гарадской СШ №1, члены раённай арганізацыі КПБ.

Заяўкі на ўдзел у акцыі падалі і розныя ўстановы адукацыі раёна. Напрыклад, сёння малады лес у Віркаўскім лясніцтве садзяць дзеці і настаўнікі Пярэкальскай школы. Яны плануюць стварыць лясы ў цэлым на 1,8 га.

«Мы рады бачыць у радах дабра­ахвотных лесаводаў людзей усіх узростаў. Лес, вядома, садзіць і калектыў лясгаса, але такая дапамога нам вельмі істотная. Працуем у лесе з удзельнікамі акцыі ўжо шэраг дзён. Пакуль будуць жадаючыя, лясгас па-ранейшаму будзе арганізоўваць работы па пасадцы лесу – прадастаўляць транспарт, пасадачны матэрыял і інвентар. Па стане на 8 красавіка ў Клічаўскім і Ганчанскім лясніцтвах у рамках акцыі паса­джана ўжо каля 30 000 сеянцаў сасны і елкі, саджанцаў бярозы. Работы працягваюцца», – канстатавала Святлана Іванаўна.

Тэкст: Ніна Ізох.