Якаснае насенне – аснова ўраджаю

Шчодры ўраджай пачынаецца з здаровага насення. Не сакрэт жа, што сяўба высакаякасным насеннем дае прыбаўку да ўраджаю ў 15-20%, а калі і больш.

Паводле даных упраўлення па сельскай гаспадарцы і харчаванню райвыканкама, для яравой сяўбы-2023 будзе выкарыстана 533 тоны насення яравых культур, што атрымана з мінулагодняга ўраджаю ў сельгаспрадпрыемствах, яшчэ 53 тоны элітнага насення – аўса, ячменю, грачыхі – закупяць у элітгаспадарках Беларусі.

Сёння практычна ўсе сельгаспрадпрыемствы раёна ўжо завяршылі ачыстку насенннага матэрыялу ад прымесяў. Дапамога ў гэтай важнай справе спатрэбілася толькі УКСП «Саўгас «Доўгаўскі», якую яму і аказала ААТ «Максімавічы-Агра».

Узоры ад кожнай партыі ачышчанага насення гаспадаркі адправілі ў дзяржаўную раённую інспекцыю па насенняводстве, каранціне і ахове раслін на праверку для вызначэння пасяўных якасцяў і атрымання аб тым адпаведнага пасведчання.

Зараз усё насенне знаходзіцца ў «стане спакою»: чакае свайго часу ў схові­шчах і складах. Але як толькі прыйдзе веснавое цяпло, установіцца плюсавая сярэднесутачная тэмпература, сельгаспрадпрыемствы пачнуць актыўную работу па пратручванні насеннага матэрыялу.

Дом у вёсцы – за адну базавую!

Аграгарадкі Бацэвічы, Заполле і яшчэ 18 вёсак уваходзяць у склад Бацэвіцкага сельсавета. Сёння тут можна купіць дом усяго за адну базавую велічыню.

Як паведаміла старшыня Бацэвіцкага сельвыканкама Галіна БАГАМОЛОВА, адна з задач мясцовай улады – скарачэнне ліку пустуючых дамоў. Такая дзейнасць рэгламентуецца адпаведным Указам Прэзідэнта Рэспублікі Беларусь ад 24 сакавіка 2021 года №116. Летась такая работа праведзена ў вёсках Усохі і Асавы, у якіх было выяўлена 12 пустуючых дамоў. Вынік: 5 такіх дамоў знесена (2 – за кошт уласнікаў, 3 – за бюджэтныя сродкі сельвыканкама), 4  рашэннем раённага суда прызнаны безгаспадарнымі, адзін з якіх прада­дзены без правядзення аўкцыёну за адну базавую велічыню, а 3 будуць знесены. У адносінах яшчэ 2-х дамоў уласнікі падалі ўведамленні, што будуць самі карыстацца гэтым жыллём і належным чынам добраўпарадкоўваць тэрыторыю. Адзін дом будзе хутка знесены.

Як бачым, пры вострай патрэбе можна затанна набыць у вёсцы ўласнае жыллё. Істотна: у Клічаўскім раёне такія дамы, паводле рашэння аблвыканкама, прадаюцца без аўкцыёну. З пачатку 2023 года ў Беларусі створаны і дзейнічае агульна­рэспубліканскі адзіны рэестр пустуючых дамоў, куды паступае ўся інфармацыя.

Сустрэчы школьных сяброў

Па добрай традыцыі ў першую суботу лютага школы раёна, як і ўсёй Беларусі, запрашаюць выпускнікоў на вечар сустрэч. Гэты дзень заўсёды доўгачаканы і хвалюючы як для колішніх вучняў, так і для педагогаў школ. У кожнай з навучальных устаноў свая праграма мерапрыемстваў. Але будуць канцэрты, пад­рыхтаваныя цяперашнімі школьнікамі, выстаўкі, ганаровыя госці – юбіляры выпускнікі, шчырыя словы, падарункі, кветкі, а ўвогуле ўрачыстая, святочная атмасфера. Людзі ўсіх узростаў зноў стануць адной школьнай сям’ёй, і будзе гучаць бясконцае «а помніш?»…

Тэкст: Ніна ІЗОХ.