Нядаўна  майскія  святы доўга  будзе  памятаць  хваёвы  лес,  што  ўздоўж  аўтамабільнай  дарогі  непадалёк  ад  вёскі  Гонча,  на,  так  званым,  сёмым  кіламетры.  Бо  стаў  ён  ахвярай  дзікунства  людзей.  У  цудоўную  зону  адпачынку  прыехала  кампанія  моладзі.  Раздолле.  Лес  у  маладой  зеляніне,  гаючае  свежае  паветра,  водар  траў  дурманіць.  Побач  гладзь  возера,  альтанка,  парадак,  чысціня.  А  што  пакінулі  пасля  сябе  гжтыя  ўладары  прыроды?  Вынік  на  гэтых  фотаздымках.  Раны  на  ствалах  дзесятка  соснаў,  з  якіх  знята  кара.  Плачуць  дрэвы  смалковымі  слязамі.  Завошта?  Колькі  ж  гадзін  патрэбна  было  карпатліва  «працаваць»,  каб  так  пакалечыць  добры  ўчастак  лесу.  На  кожным  ствале  выразаны  вялізныя  надпісы  «Лёха»,  «Маша»,  «Таня»  і  г. д.  Гэта,  мусіць,  каб  кожны,  хто  прыйдзе  сюды  адпачываць  або  па  лясныя  дары,  ведаў,  як  завуць  гэтых  варвараў  або  іх  дзяўчат.  Толькі  ці  будуць  радыя  таму  апошнія  «Аўтографы»  ж  лес  будзе  загойваць  доўга.  Можа  пабачыўшы  гэтыя  фотаздымкі  ў  газеце, «аўтары»  хоць  са  спазненнем,  але  ж  адчуюць  мукі  сумлення.

У  непрыгодны  стан  адпачываючыя  прывялі  і  саму  альтанку.  Таму  лясгас  вымушаны  закрыць  гэту  раней  найпрыгажэйшую  зону  адпачынку.

На  сённяшні  дзень  ДЛГУ  «Клічаўскі  лясгас»  мае  ўздоўж  аўтамабільных  дарог  раёна  7  зон  адпачынку,  на  якіх  устаноўлена  26  альтанак,  кожная  з  іх  малая  архітэктурная  форма – упрыгожванне  дзіўных  куткоў  прыроды.  Каб  стварыць  усе  ўмовы  для  адпачынку  падарожнікаў  і  насельніцтва,  пастаянна  падтрымліваць  іх  у  належным  стане,  робіцца  нямала.  Штодня  леснікі  наводзяць  тут  парадак,  чысцяць,  прыбіраюць,  рамантуюць  паламанае,  ўзнаўляюць  тое,  што  руйнуюць  адпачываючыя.  А  гэта,  у  першую  чаргу,  паказчык  агульнай  нізкай  культуры  людзей.

Адзначу,  што  толькі  за  сёлетні  красавік  на  рамонт  і  добраўпарадкаванне  зон  адпачынку  наша  прадпрыемства  зрасходвала  больш  за  2  мільёны  рублёў.

Але  ж  як  ацаніць  урон  прыродзе?  Сёння  да  парушальнікаў  прыродаахоўнага  заканадаўства  існуюць  розныя  меры  спагнання,  у  асноўным  штрафныя  санкцыі.  Але  ці  ўратуе  гэта  лес,  ён  жа – лёгкія  зямлі, наш  зялёны  сябар.  Будзем  жа  разумнымі  і  міласэрнымі.

Алена  ПОРСІК,

інжынер  па  лесааднаўленню

ДЛГУ  «Клічаўскі  лясгас»