Сённяшні  мой  суразмоўца — Марыя  Міхайлаўна   МАТУЗАВА,  галоўны  спецыяліст  упраўлення  па  працы,  занятасці,  сацыяльнай  абароне  райвыканкама.  З  ёй  мы  гутарым  аб становішчы  на  рынку  працы  і  працаўладкаванні  найбольш  неабароненых  грамадзян.
– Марыя   Міхайлаўна,  спачатку   раскажыце,  калі  ласка,  якім  чынам  фарміруецца  банк  даных  аб  вакансіях  на  рынку  працы?
– На  падставе  заканадаўства  наймальнікі  ўсіх  формаў   уласнасці   інфармуюць  наша  ўпраўленне   аб  вакансіях,  а  мы  фарміруем  банк  даных.  Потым  размяшчаем  інфармацыю  на  сайце  райвыканкама  і  падаём  яе   ў   рэспубліканскую   базу  вакансій.  Усе  грамадзяне,  якія  маюць  жаданне  працаваць,  могуць  азнаёміцца  з  інфармацыяй  аб  вакансіях  у  інтэрнэце  і  непасрэдна  ў  нашым  упраўленні.  Па  стане  на  1  чэрвеня  ў  нас  маецца  98  вакансій.
– Якіх  спецыялістаў  і  рабочых  якіх  прафесій  не  хапае  ў  нашым  раёне?
– У  АПК  раёна  не  хапае  галоўных  спецыялістаў,  такіх  як  аграном,  заатэхнік,  ветэрынарны  ўрач,  эканаміст,  бухгалтар,  інжынер  па  сельгасмашынах. У  будаўнічых  арганізацыях –  муляраў,  газаэлектразваршчыкаў  і  іншых.  У  лясной  і  дрэваапрацоўчай  галіне  патрабуюцца  рамшчыкі,  валь-шчыкі,  станочнікі,  леснікі,  ляснічыя  і  шэраг  іншых  рабочых  прафесій.
Заўважу,  што  непрацуючыя  грамадзяне, якія  ва  ўстаноўленым  парадку  зарэгістраваныя  ў  якасці  беспрацоўных,  або  тыя,  хто  звярнуўся  да  нас  і  атрымаў  накіраванне  на  працаўладкаванне,   медыцынскую  камісію  праходзяць  бясплатна.  Летась  мы  працаўладкавалі  430  чалавек,  у  тым  ліку  279  беспрацоўных.  У  студзені – маі  гэтага  года  працаўладкавана  90  чалавек,  84  з  іх  мелі  статус  беспрацоўных.
— У  сувязі  з  70-годдзем  вызвалення  Беларусі  ад  нямецка-фашысцкіх  захопнікаў  Прэзідэнтам  краіны  быў  падпісаны  указ  аб  амністыі.   У  хуткім  часе  з  месцаў  пазбаўлення  волі  будуць  адпушчаны  амаль  2,8 тысячы  чалавек.  Вызваліць  ад  крымінальнай  адказнасці  і  ўсіх  відаў  крымінальных  пакаранняў  плануюць  так  званую  льготную  катэгорыю  асоб.  Большасць  з  іх  пачне  працаўладкоўвацца.  Наколькі  гатовы  мясцовы  рынак  працы  прыняць  гэту  катэгорыю  грамадзян?  Якія  льготы  прадугледжаны  для  наймальнікаў  усіх  формаў  уласнасці,  якія  прымаюць  на  працу  раней  асуджаных?
– Для  працаўладкавання  грамадзян,  якія  маюць  асаблівую  неабходнасць  у  сацыяльнай  абароне  і  не  маюць  магчымасці  на  роўных  канкурыраваць  на  рынку  працы,   у  адпаведнасці  з   законам  Рэспублікі  Беларусь  “Аб  занятасці  насельніцтва  Рэспублікі  Беларусь”,  рашэннем  райвыканкама  штогод  устанаўліваецца  бронь  на  прыём  на  працу  сацыяльна  неабароненых  катэгорый  грамадзян.
У  прыватнасці,  на  гэты  год  квота  ўстаноўлена  на  працаўладкаванне  50  чалавек.  З  пачатку  года  атрымалі  работу  11.  Асаблівая  ўвага  ўдзяляецца  праца-ўладкаванню  грамадзян,  вызваленых  з  месцаў  пазбаўлення  волі.  У  красавіку  Савет  Міністраў  за-цвердзіў  “Палажэнне  аб  парадку  арганізацыі  і  фінансавання  мерапрыемстваў  па  працаўладкаванні  грамадзян,  вызваленых  з  выпраўленчых  устаноў,  у  тым  ліку  частковай  кампенсацыі  затрат  па  аплаце  працы  такіх  асоб”.  З  16  красавіка  гэта  пастанова  ўступіла  ў  законную  сілу.  У  нас  распрацаваны  шэраг  мерапрыемстваў,  накіраваных  на  ўсебаковую  падтрымку  гэтай  катэгорыі  сацыяльна  неабароненых  грамадзян,  наладжана  цеснае супрацоўніцтва  з  наймальнікамі  ўсіх  формаў  уласнасці  і    своечасовае  браніраванне  месцаў   для  іх  працаўладкавання.  Стараемся  працаваць  індывідуальна  з  кожным  чалавекам  і  падбіраем  падыходзячае  яму  працоўнае  месца, а  жадаючым  атрымаць  прафесію  ці  павысіць  кваліфікацыю  прадастаўляем  такую  магчымасць.
Згодна  з  вышэйзгаданым  дакументам  пры  прыёме  на  работу  раней  асуджаных  наймальнікі  ўсіх  формаў  уласнасці  на  працягу  12  месяцаў  з  моманту  працаўладкавання  маюць  права  на  частковую  кампенсацыю  затрат  па  аплаце  іх  працы.

Гутарыла  Аліна СУДНІК.