Як бы хто ні казаў, што сёння век высокіх тэхналогій і прарыўных распрацовак, а народная творчасць, што атрымалі ад прадзедаў у спадчыну – асаблівая каштоўнасць. Яна – наша сёння, у ёй –карані і наша моц!

Вырабы ручной работы – гэта цэлы скарб, непаўторнае хараство, у якім душа творцы і цяпло яго рук. Таленавітых людзей на Клічаўшчыне шмат, але ж у нас ёсць не проста аматары промыслаў і рамёстваў, а прафесіяналы, якія аб сабе важка заяўляюць і на рэспуб­ліканскім узроўні!

Клічаўскі раённы Дом рамёстваў – гэта сапраўдная творчая лабараторыя. Калі сюды не зазірні, яго майстры народных рамёстваў карпатліва ствараюць прыгажосць, прычым, унікальную. Кожны спецыя­лізуецца на канкрэтным відзе творчасці, а пры неабходнасці тут нараджаюцца і калектыўныя работы – вялікія выставачныя тэматычныя калекцыі.

Дзмітрый ШАМЫНА – майстар лозапляцення, яго цудоўныя работы – ад плеценых вазачак, кошычкаў да мэблі – ёсць у дамах мноства жыхароў раёна і не толькі.

У майстарскіх руках
Уладзіміра ДЗЯРЖАНСКАГА драўніна набывае новае жыццё. Яго канёк – мастацкая апрацоўка дрэва. Яго справа і выраб драўляных асноў для будучых шэдэўраў калег – тых жа інкруставаных велікодных яек, лялечак-матрошак, мастацкія рамкі для абрамлення карцін, пано, і іншае. З-пад яго залатых рук выходзяць самыя розныя прадметы, ад дробных – для хатняга ўжытку – да драўлянай мэблі, гаспадарчых тавараў. Прызнанне заваявана даўно, таму і заказаў шмат з не толькі з нашага раёна, а і рэгіёнаў Беларусі. У рабоце майстар выкарыстоўвае як ручны інструмент, так і розныя дрэваапрацоўчыя станкі.

Наталля ЛАПАЦІНА, майстар саломапляцення і інкрустацыі саломкай, сучасных відаў творчасці, у прадстаўленні не мае патрэбы. Яе рукатворныя залатыя саламяныя дзівосы – гэта ўжо мастацкі брэнд нашага краю.

Іх маладая калега, Яніна
КОЗЫРАВА, спецыяліст па кераміцы, працуе з глінай. Яна таксама чалавек, улюбёны ў сваю справу. Яніна нават праводзіла майстар клас для замежных гасцей IV Міжнароднага фестывалю беларусаў свету, вучыла іх мастацкаму роспісу прадметаў куханнага ўжытку. Дарэчы, Яніна – бабруйчанка, адпрацавала ў нашым РДР устаноўлены тэрмін па размеркаванні і засталася ў Клічаве надалей. Па ўсім відаць, ёй тут усё падабаецца.

– Лічу, мне пашчасціла працаваць з такімі таленавітымі людзьмі, – гаворыць загадчык раённага Дома рамёстваў
Лізавета КАВАЛЁВА. – Побач з імі немагчыма не тварыць, не расці творча! Наш калектыў пастаянны ўдзельнік самых розных выставак, святаў, фестываляў. Апошнія нашы дасягненні – па выніках удзелу ў сёлетнім рэспубліканскім свяце «Александрыя збірае сяброў». Асабліва важкія ўзнагароды нашых майстроў – у абласным конкурсе «Дрэва жыцця». Мы ганарымся, што Дыпломам I ступені ўзнагароджана Наталля Лапаціна за работу «Сімвал жыцця» – пано, выкананае ў тэхніцы аплікацыя саломкай, лён.

Дыпломамі II ступені конкурсу адзначаны работы Янініны Козыравай – пано «Сімвал жыцця» (кераміка, пап’е-машэ) і Алёны ШАПРУНОВАЙ, удзе­льніцы мастацка-творчага аб’яднання «Адраджэнне» РДР – цудоўны вышываны ручнік «Сувязь з продкамі».

Прыемна, што сярод намінантаў на ўзнагароды гэтага ж абласнога конкурсу «Дрэва жыцця» і супрацоўніца раённага Дома культуры – Тамара КУЗЬМІЦКАЯ, кіраўнік яго народнай студыі дэкаратыўна-прыкладной творчасці «Спадчына». Тамара Сяргееўна за аўтарскі вышываны ручнік «Сувязь пакаленняў» узнагароджана дыпломам III ступені.

Віншуем нашых землякоў-творцаў з творчымі дасягненнямі. Няхай і надалей натхненне і поспех будуць у вашых спадарожніках!