Хлебароб. Гэта шчымліва-роднае, гордае званне многія з сённяшніх работнікаў ААТ «Максімавічы-Агра» атрымалі ў спадчыну яшчэ ад прадзедаў. І няхай сёння тут аруць зямлю ўжо трактары з камп’ютарным, спадарожнікавым упраўленнем, але ж аснова поспеху – людзі з моцнымі сялянскімі каранямі.

З гэтай кагорты і Валерый МАКАРЭВІЧ, адзін з лепшых трактарыстаў-машыністаў сельскагаспадарчай вытворчасці ААТ «Максімавічы-Агра». У яго жыцці, як ў прыказцы «Дзе нарадзіўся, там і згадзіўся». Ён мясцовы, з суседняй Ліпніцы, Максімавіцкую сярэднюю школу скончыў. На малой радзіме і жыццё праходзіць, а ў працоўнай кніжцы – адзін запіс аб прыёме ў мясцовае сельгаспрадпрыемства.

За плячамі ўжо 35 гадоў шчырай працы на роднай зямлі. Увесь цёплы сезон Валерый Пятровіч заняты на ўнясенні мінеральных тукаў, хімпраполцы раслін: кукурузы, збожжавых і зернебабовых культур, падвозцы насення пад час яравой і азімай сяўбы, адвозцы зялёнай масы на нарыхтоўцы кармоў для грамадскага статка. Спраў безліч! Пры любых абставінах кіраўніцтва ўпэўнена: Валерый Макарэвіч не падвядзе, работы выканае ў тэрмін, з поўнай адказнасцю, якасна.

З года ў год павышаецца яго прафесійнае майстэрства, а вытворчыя паказчыкі толькі растуць. Вось і ў сёлетнім жніве Валерый Пятровіч быў у лідарах, на камбайне КЗС-1218 намалаціў 950 тон збожжа і рапса, пераўзышоў свой мінулагодні вынік на 136%. Дарэчы, Валерый Макарэвіч на сваім камбайне аказваў сёлета дапамогу ва ўборцы ўраджаю ў Мсціслаўскім раёне, шчыраваў там напрацягу двух тыдняў у двух сельсгаспрадпрыемствах.

За гады працы ён неаднаразова выходзіў пераможцам раённых спаборніцтваў, яго поспехі адзначаны і абласнымі ўзнагародамі. Добрыя, працавітыя людзі на вёсцы заўсёды ў пашане, вось і Валерый Пятровіч карыстаецца заслужанай павагай і ў гаспадарцы, і сярод землякоў.
У гэтыя дні Валерый Макарэвіч прымае віншаванні ад родных і калег з важкай узнагародай – Падзякай Старшыні Савета Рэспуб­лікі Нацыянальнага сходу Рэспублікі Беларусь!