У гэтыя вераснёўскія дні ўсе намаганні земляробаў ААТ «Максімавічы-Агра» падпарадкаваныя галоўнай задачы дня – нарыхтоўцы кармоў з кукурузы, якая паспела на 650 гектарах. Са скошаных 153 гектараў нарыхтавана 4608 тон зялёнай масы, сіласу – 2852 тоны. Ураджайнасць яе – 301 цэнтнер з гектара.
Нарыхтоўка кармоў — справа камандная, таму сфарміравалі механізаваны атрад. У дзень нашага наведвання ўбіралі поле перад вёскай Старыя Максімавічы. З ранку і да позняга вечара на кукурузаўборачных камбайнах працуюць Аляксандр Міхайлавіч Сакаў, Валерый Пятровіч Макарэвіч. Саладкаваты водар свежаздробленай зялёнай масы стаіць над полем, а нагружаныя ёй МАЗы з інтэрвалам у некалькі хвілін ланцужком імчаць да малочна-таварнага комплексу. За рулём – Анатоль Міхайлавіч Казлоў, Аляксандр Іванавіч Кірплюк, Ігар Канстанцінавіч Мароз, Мікалай Васільевіч Кошаль, Аляксандр Сяргеевіч Самец і іншыя.
На комплексе – чысціня, у хлявах мірна парыквае сытая жывёла. Брыгадзір комплексу Святлана Уладзіміраўна Кірплюк вядзе строгі ўлік рэйсаў і танажу зялёнай масы. Падбуртоўкай і трамбаваннем на «Амкадоры» заняты Валянцін Канстанцінавіч Навашынскі і на трактары МТЗ-12 21 Яўген Вячаслававіч Сотнікаў.
Да вечара агульнымі стараннямі запоўнена будзе ўся траншэя, а гэта 2000 тон закансерваванага па ўсіх правілах выдатнага бялковага корму. Высокая забяспечанасць жывёлы паўнацэннымі кармамі – надзейная аснова для паспяховага выканання заданняў па вытворчасці малака і мяса. Дзякуючы добра арганізаванай, зладжанай рабоце працаўнікоў ААТ «Максімавічы-Агра» з кожным днём тэмпы нарыхтоўкі кармоў з кукурузы нарастаюць.
Аліна СУДНІК. Фота аўтара.