У  нас —  прыродны  газ.  А  ў  вас?

Аграгарадок  Доўгае.   Сёння  прыродны  газ ёсць тут  у  24  кватэрах   трохпавярховых  дамоў   і  ў  14-ці  індывідуальных  жылых  дамах.  І  калі  ў  кватэрах  блакітнае  паліва  выкарыстоўваецца  толькі  для  прыгатавання  ежы, то  ў  прыватных  домаўладаннях  яшчэ   для  ацяплення і    падагрэву вады.

У хуткім  часе  газіфікаванага  жылля  стане  больш.  У аграгарадку  створаны  спажывецкі  кааператыў  па   газіфікацыі,  у  якім,  дарэчы,  толькі  двое  домаўладальнікаў  з  вуліцы  Лясной.   У  гэтыя  дні  на  ёй  ідуць  работы  па  будаўніцтве  вулічнага  размеркавальнага  газаправода  да  дамоў  членаў  кааператыва –№ 29, 30.   Гэта  аб’ект  ААТ  “Бабруйскгазбуд”,  якое  папярэдне  выйграла  адпаведны  тэндар.  Работы  будуць  завершаны  ўжо  да  канца  красавіка.

Дарэчы,  пасля  ўводу  аб’екта  ў  кааператыў  пры  жаданні  могуць  уступіць  і  іншыя  вяскоўцы,  але  пры  гэтым  патрэбна  будзе  выканаць пэўныя  ўмовы.

                                   Гісторыя  з  геаграфіяй

Аграгарадок  Бацэвічы.  Апошні  тыдзень  вымушаных  школьных  канікул  у  ДУА  “Бацэвіцкі  УПК  дзіцячы  сад – сярэдняя  школа”  працаваў  аздараўленчы  лагер  “Непаседы”,  які  наведвалі  дзеці  розных  узростаў.  Мерапрыемствы  для   іх  ладзіліся  ў  асноўным  на  вольным  паветры.  Гэта  быў  спрыяльны  час  і  для  краязнаўства.  Аднойчы  дзеці  зрабілі  вандроўку  ў  прыроду,  падчас  якой  на  месцы  знаёміліся  з  гісторыяй  і геаграфіяй   малой  радзімы.  Падарожжа  пачалі  з  месца  “Баржы”.  Гэты  тапонім  застаўся  яшчэ  з  тых  часоў,  калі  Ольса  была  судаходнай.  Дзеці  прайшлі  некалькі  кіламетраў уздоўж  ракі,  а  пасля — па   старым  насыпе  колішняй  дарогі,  што  вяла   да  цаглянага  завода. Наведаліся  яны  да  жывой  крынічкі, якой  раней  карысталіся  рабочыя  прадпрыемства.

У  гэты  дзень  краяведы  зрабілі  добрую  справу – навялі  парадак  і  чысціню  на  тэрыторыі  крынічкі,  што  ў  самім  аграгарадку.

                                          Атулены  клопатам

Нясяцкі  сельсавет.  У  яго  ўваходзіць  30  населеных  пунктаў,  у  якіх  пражывае  2444  чалавекі,  з  іх  601 – пенсіянер.  За  2019  год  за  кошт  сродкаў    “Дзяржаўнай  праграмы  аб  сацыяльнай  абароне  і  садзейнічанні  занятасці  насельніцтва  на  2016-2020 гады”  аказана  дзейсная  падтрымка  адзінокім  пажылым  грамадзянам,  адзінокім  інвалідам  I і II  груп.  У  прыватнасці,  у трох   домаўладаннях  адзінокіх  пажылых  людзей   выкананы  рамонт  печаў: 1 – у вёсцы  Дуброва,  2 – у  аграгарадку  Нясята,  а  таксама   рамонт  печы ветэрану   Вялікай  Айчыннай  вайны  з  вёскі  Лянёўка.    У  11-ці  домаўладаннях  грамадзян  з  гэтых  жа  катэгорый  насельніцтва  ў   розных  вёсках сельсавета  ўстаноўлены  аўтаномныя  пажарныя  паведамляльнікі.

Клопат   дзейсны,  бо, напрыклад,  толькі  рамонт  адной  печы  абыходзіўся  дзяржаве  ў  сярэднім  каля  650  рублёў.

У  цэлым  за  2019  год у  раёне  па  ўказанай  дзяржаўнай  сацыяльнай  праграме  адрамантавана  7  печаў,  праведзена  замена  электраправодкі  ў  3-х  домаўладаннях,  устаноўлена   40  АПП,  адзін з  іх  – адзінокаму  ветэрану   Вялікай  Айчыннай  вайны  з  вывадам  на  сігнальна-гукавое  абсталяванне.

Ніна  ІЗОХ.