Гаспадары сваёй зямлі

Насельніцтва Патоцкага сельскага Савета складае зараз 1574 чалавекі (па стане на 1 студзеня 2023г.). Самыя буйныя населеныя пункты – аграгарадок Дзмітрыеўка (688 жыхароў), вёска Стаялава (148 жыхароў) і аграгарадок Слабодка, дзе сёння жывуць 139 чалавек. 

У склад сельскага Савета ўваходзяць 29 населеных пунктаў, у трох з іх – Восаве, Перасопні і Убалацці – ніхто не жыве. 

На тэрыторыі сельсавета нямала прадпрымальных людей, якія адкрылі ўласную справу, у тым ліку – фермерскую гаспадарку. Не толькі ў раёне, але і ва ўсёй Беларусі, вядома сялянская гаспадарка «Канстанта арт» Віктара АРЦЕМ’ЕВА, што знаходзіцца ў вёсцы Канстантоў. Яе дзейнасць грунтуецца на арганічным земляробстве. У цяплічнай гаспадарцы і на сваёй зямлі сям’я вырошчвае экалагічна чыстую гародніну, якую з задавальненнем набываюць і гараджане, і вяскоўцы.

Маштабна і рознавектарна развіваецца сялянская гаспадарка «Баярскае» Віталя МАЦЮШОНКА ў вёсцы Паплавы. Штогод гаспадар садзіць бульбу розных гатункаў і збожжавыя культуры, у арэндзе і ладны вадаём, у якім разводзіць рыбу.

Вырошчваннем самай разнастайнай гародніны на землях каля Убалацця займаецца сялянкая гаспадарка «Фасолька» Таццяны БАГДАНЧУК. 

А галава фермерскай гаспадаркі «Аграэлітальянс» Ілья САМЕЦ з аграгарадка Дзмітрыеўка пачаў сваю дзейнасць з бульбаводства. «Другі хлеб» ён вырошчваў на сваіх землях бліз Усакіна.

Міфічныя, містычныя … павукі!

Упершыню ў Клічаве – выстаўка павукоў! Толькі з 2 да 21 лютага ў краязнаўчым музеі працуе прывазная выстаўка павукоў «Суседзі па планеце». Тут сабраны самыя неверагодныя павучкі, самыя незвычайныя і яркія прадстаўнікі: Бразільскі чорна-белы павук, Акантаскурыя генікулята (павук-птушкаед), а яшчэ таракан-аўта­мабільчык, Мадэрыйскі таракан і іншыя – жыхары трапічных краін планеты.

У музеі для наведвальнікаў падрыхтавалі шмат цікавых фактаў аб насякомых і з гэтым багатым дакументальным матэрыялам можна пазнаёміцца, наведаўшы выстаўку. А бонус для самых юных наведвальнікаў – прагляд мультфільма «Чалавек-павук».

Прыгажосць і зручнасць – на заказ

Патрэбны крэатыўны, памятны падарунак або прадметы хатняга ўжытку ручной работы? Дапамогуць майстры народных мастацкіх рамёстваў раённага Дома рамёстваў! Па вашым заказе майстар лозапляцення Дзмітрый ШАМЫНА спляце з лазы кошык любой формы, паднос для кавы з ручкамі, хлебніцу, вазу для садавіны, падстаўку, ключніцу і г.д.

Эдуард ДЗЯРЖАНСКІ – майстар па дрэве. Клічаўляне і сяльчане з задавальненнем заказваюць у яго мэблю-трансформер: складныя табурэткі (іх любяць рыбакі), камплекты дзіцячай мэблі (табурэткі і стульчакі), розныя вешалкі, рамкі, палічкі, зэдлікі і г.д.

Работы Рэнаты КАЗАКЕВІЧ – яркія і маляўнічыя, бо яна – мастак, а яшчэ майстар па роспісе. 

Саламяныя цуды – плён працы Наталлі ЛАПАЦІНАЙ. Яна працуе як у тэхніцы саломапляцення, так і інкрустацыі саломкай.

У РДР можна набыць і разнастайныя вырабы з гліны, якія вырабляе майстар- кераміст Віктар ДЗЕМЯШКЕВІЧ, загадчык установы. Добрым памятным падарункам родным і сябрам стануць разнастайныя сувеніры з керамікі: прадукцыя з дзяржаўнай сімволікай, у тым ліку Клічаўскага краю, а таксама пано, падковы і іншае.

Тэкст и фото: Ніна Ізох