Педагогі  дзіцячага  сада-ясляў  № 5  перакананыя,  што  выхаванне  такіх  якасцей  асобы,  як  спачуванне,  павага,  міласэрнасць  неабходна  прывіваць  малышам  з  самага  ранняга  ўзросту,  таму  і  прапанавалі  бацькам  выхаванцаў  старэйшай  групы  падтрымаць  сваіх  сыночкаў  і  дачушак  у  імкненні  падрыхтаваць  віншаванне  са  святам  8  Сакавіка  незнаёмым  бабулям,  якія  пражываюць  у  Доме  ветэранаў.
Мерапрыемства  “Дарога  дабра”    рыхтавалі  ўсе  разам.  Дзеці  з  бацькамі  напісалі  лісты  і  віншавальныя  паштоўкі,  напяклі  смачнага  печыва.  З  выхавальніцай  Людмілай  Мацюшонак  старанна  падрыхтавалі  падарункі.
Дзеці  хваляваліся  не  менш,  чым  дарослыя.  Сустрэча  атрымалася  цёплай  і  вельмі  шчырай.  З  дзіцячай  непасрэднасцю    малышы  віншавалі  бабуль  са  святам  вясны.  Ветлівыя  словы,  вершыкі  і  песні  ў  выкананні  юных  артыстаў  да  слёз  кранулі  сэрцы  пажылых  людзей,  а  падарункі  і  пачастункі  даставілі  мора  радасці.  Падобныя  мера-прыемствы  вельмі  важныя  ў  жыцці  дзяцей,  паколькі  служаць  добрым  прыкладам,  вучаць  любіць  і  шанаваць,  быць  шчырымі,  чулымі.
Ажыццявіць  падарожжа  дзетак  у  Дом  ветэранаў  дапамог  аддзел  адукацыі,  спорту  і  турызму,  які  прадаставіў  аўтобус.

Святлана  ТАРЭЛКА,
намеснік  загадчыка  д/с  № 5  г. Клічава  па  асноўнай  дзейнасці.