«Іосіфавіч» вырошчвае бружмель
Фермерская гаспадарка «Іосіфавіч» у аграгарадку Заполле з дапамогай сталічных вучоных эксперыментуе з бружмелем.
Галава сялянскай гаспадаркі Казімір Грасевіч лічыць гэты кірунак выгадным. Сёння на яго польдарных землях пладаносіць каля 100 кустоў бружмелю. Ягады паспяваюць нават раней, чым клубніцы, з’яўляюцца надзвычай карыснымі і нават лекавымі, да таго ж маюць попыт за мяжой. А яшчэ кусты бружмелю дазваляюць захаваць глебу на выпрацаваных тарфяніках.
Побач з экзатычнай раслінай на фермерскіх палетках пасаджаны морква і сталовыя буракі. Іх плошчы меншыя ў разы ў параўнанні з папярэднімі гадамі. Улічыўшы сітуацыю ў краіне і свеце, фермер зрабіў сёлета стаўку на збожжавыя культуры, якія на яго палетках займаюць дзясяткі гектараў.
Знайдзі працу онлайн!
20 мая ўпраўленне па працы, занятасці і сацыяльнай абароне райвыканкама сумесна з наймальнікамі правяло чарговы «Электронны кірмаш вакансій» на сайце e-vacancy.by.
Наведвальнікі мелі магчымасць азнаёміцца з вакансіямі, задаць наймальнікам пытанні, якія іх цікавяць, атрымаць электронную кансультацыю, запрашэнне на гутарку. У электронным кірмашы прымалі ўдзел ДУКДБП «Клічаўская ПМК-258», УКСП «Саўгас «Дабраволец» і іншыя арганізацыі, якія маюць патрэбу ў кадрах.
На 29 мая ў раёне заяўлена 107 вакансій у розных арганізацыях раёна,
з іх 76 – рабочыя прафесіі.
Інфармацыя аб актуальных вакансіях пастаянна размешчана на сайце райвыканкама. Выбар ёсць!
Працоўнае лета
Клічаўская раённая арганізацыя БРСМ плануе за лета працаўладкаваць важатымі ў аздараўленчы лагер «Ольса» членаў трох студэнцкіх атрадаў. У іх увойдуць студэнты-практыканты МДУ імя Аркадзя Куляшова і маладыя педагогі раёна.
Справы на карысць грамадства – кірунак дзейнасці і валанцёрскіх атрадаў. У прыватнасці, не так даўно валанцёры мясцовага аграрна-тэхнічнага каледжа і старшакласнікі клічаўскіх школ добраўпарадкавалі дзіцячую пляцоўку ў гарадскім парку. Напрыканцы мінулага тыдня РК ГА БРСМ сумесна з раённай інспекцыяй прыродных рэсурсаў і аховы навакольнага асяроддзя, актывістамі БРСМ з ДУА «Сярэдняя школа №2 ім. П.І. Кавалёва» правялі акцыю «Чысты вадаём». Моладзь прыбрала бераг ракі Ольсы ў раёне гарадскога пляжа і маста.

Тэкст: Ніна ІЗОХ