Дабрачынная акцыя «Цуды на Каляды» стартавала на Клічаўшчыне. Свае навагоднія падарункі, а таксама пазітыўныя эмоцыі ад сустрэчы з валанцёрамі, ужо атрымалі маленькія пацыенты цэнтральнай раённай бальніцы і выхаванцы цэнтра карэкцыйна-развіваючага навучання і рэабілітацыі.
Сімвалам гэтай акцыі з’яўляюцца чырвоныя рукавічкі, якія атаясамліваюць імкненне моладзі і дзяцей падарыць часцінку свайго цяпла і добрага настрою тым людзям, якім асабліва патрэбны ўвага і падтрымка ў гэтыя перадсвяточныя дні. Нездарма Снягурка, якая завітала ў бальніцу і цэнтр карэкцыі разам з актывістамі маладзёжнага руху раёна, сыпала цукеркі ў далонькі хлопчыкаў і дзяўчынак прама са сваёй рукавіцы. Ці трэба казаць, што такому сюрпрызу дзеці былі вельмі рады. У малых літаральна загараліся вочкі, калі ў дзвярах іх палат або ігравых пакояў з’яўлялася казачная прыгажуня.
У цэнтры карэкцыйна-развіваючага навучання і рэабілітацыі добрых гасцей сустракалі Саша, Рома, Арцём, Ваня і Ксюша. Удзельнікі акцыі падаравалі ім не толькі прысмакі, але і розныя цацкі, кніжкі, развіваючыя гульні. Дзеці адразу ж пачалі бавіцца са сваімі падарункамі. У падзяку за дабрыню адзін з хлопчыкаў нават прачытаў гасцям невялічкі вершык.
У бальніцу ж дабрачынцы завіталі зусім нечакана. Тут у гэты час лячыліся трое дзетак. Пяцігадовы Дзяніс спачатку крыху саромеўся Снягурку, але хутка развесяліўся, разгаварыўся… Казачная дзяўчына паабяцала малому перадаць усе яго жаданні Дзеду Марозу, які ў той дзень быў заняты пакаваннем падарункаў і чытаннем лістоў. Не застаўся без увагі і старэйшы хлопец, які ляжаў у гэтай жа палаце. Яму таксама падаравалі рукавічку шакаладных цукерак. Атрымала тады ласункі і гадавалая Палінка, якая ўвогуле ўпершыню бачыла Снягурку.
З наступаючымі святамі дзяцей віншавалі першы сакратар РК ГА БРСМ Юлія Комар, галоўны спецыяліст аддзела ідэалагічнай работы, культуры і па справах моладзі райвыканкама Анастасія Шалай, загадчык дзіцячага аддзела РДК Алена Пятруша, інспектар групы прапаганды і ўзаемадзеяння з грамадскасцю РАНС Юрый Караўка. На гэтым тыдні яны плануюць наведаць яшчэ і аддзяленне дзённага знаходжання інвалідаў Клічаўскага РЦСАН, выхаванцам якога таксама патрэбны клопат і ўвага.

Ганна БЯЗРУЧАНКА.
Фота аўтара.