ШКОЛЬНАЯ  ПАРА

Пралятаюць  гарачыя  жнівеньскія  дзянькі,  і  літаральна  праз  тыдзень  залівісты  школьны  званок  пакліча  хлопчыкаў  і  дзяўчынак  за  парты.  У  новым  навучальным  годзе  ўпершыню  за  парты  сядуць  170  першакласнікаў,  да  таго ж,  у  школах  раёна  10  выпускных  класаў.  105  выпускнікоў  будуць  крочыць  да  сваёй  мэты  і  ўпарта  рыхтавацца  да  выпускных  экзаменаў.
Дарэчы,  12  выпускнікоў  гэтага  года   з  нашага  раёна  на  цэнтралізаваным  тэсціраванні  набралі  ад  86  да  100  балаў.

НАВІНКІ  Ў  АДУКАЦЫІ

Новы  школьны  прадмет  “Мастацтва” (“Сусветная  мастацкая  культура”) пачнуць  вывучаць  вучні  5-х  класаў.
У  шэрагу  школ  пачнуць  функцыянаваць  профільныя  класы.  З  паглыбленым  вывучэннем  рускай  і  англійскай  мовы,  гісторыі  і  грамадазнаўства, матэматыкі  і  фізікі  вызначыліся  педагагічныя  калектывы  абедзвюх  гарадскіх  і  Максімавіцкай  сярэдніх  школ.

МАЛАДАЯ  ЗМЕНА

Сёлета  педагагічная  суполка  раёна  папоўніцца  больш  як  10  маладымі  спецыялістамі,  у  ліку  якіх  псіхолаг,  гісторык,  хімік,  а  яшчэ  настаўнікі  матэматыкі,  фізікі,  музыкі  і  мастацтва,  фізічнай  культуры  і  здароўя,  беларускай  і  рускай  мовы  і  літаратуры.

ІДЭАЛОГІЯ

* Аб  ролі  грамадскіх  арганізацый  і  аб’яднанняў,  прафесіянальных  саюзаў  у  арганізацыі  інфармацыйна-тлумачальнай  работы  ў  перыяд  важных  палітычных  кампаній  ішла  размова  на  чарговым  семінары  ідэалагічнага  актыву  раёна.  Перад  прысутнымі  выступілі:  Г. П. Данілкіна,  намеснік  старшыні  райвыканкама,  С. П. Грашылаў,  старшыня  раённага  аб’яднання  прафсаюзаў, Т. В. Белабародая,  старшыня  раённай  арганізацыі  рэспубліканскага  грамадскага  аб’яднання  “Белая  Русь”,  Ю. І. Комар,  сакратар  райкама  ГА  БРСМ.
* Тэмы  чарговага  дня  інфармавання  насельніцтва — “Сацыяльна-эканамічнае  і  грамадска-палітычнае  развіццё  Рэспублікі  Беларусь”,  “Папярэджанне  дзіцячага  дарожна-транспартнага  траўматызму”,  “Харчовая  бяспека  краіны”.  Акрамя  ідэалагічнага  актыву раёна,  у  працоўных  калектывах  адбыліся  сустрэчы  з   прадстаўнікамі  абласной  ідэалагічнай  вертыкалі.    С. А. Жыгуноў,  начальнік  Магілёўскага  абласнога  дэпартамента  дзяржаўнай  інспекцыі  працы,  у  райвыканкаме  правёў  прыём  грамадзян,  а  потым    сустрэўся  з  калектывам  УКП  “Жылкамгас”;  Д. В. Казлоў,  намеснік  начальніка  ўпраўлення  ЖКГ  Магілёўскага  аблвыканкама,  наведаў  вытворчую  базу  камунгаса  і  пагутарыў  з  рабочымі;  В. І. Васілеўскі,  генеральны  дырэктар  ААТ  “Магілёўаўтатранс”,  пацікавіўся  станам  спраў  і  сустрэўся  з  калектывам  участка  “Клічаў”  Бабруйскага  філіяла  аўтакалоны  № 2 ААТ  ”Магілёўаўтатранс”.
* Старшыня  раённага  выканаўчага  камітэта  Ф. В. Вашчыла  на  мінулым  тыдні  наведаў  працоўныя  калектывы  ААТ  “КлічаўРАПТЗ”,  КСВК  “Калгас  “Радзіма”,  педагагічны  калектыў  Максімавіцкай  сярэдняй  школы.  Францішак  Вітольдавіч  паабяцаў  дапамагчы  ў  набыцці  матэрыялаў  для  рамонту  даху  школы  і  пацікавіўся  комплексам  работ  на  будаўніцтве  другой  чаргі  жывёлагадоўчай  фермы.

ДАЖЫНКІ — 2015

Абласныя  дажынкі  сёлета  пройдуць  у  Круглянскім  раёне,  а  раённыя  прыме  аграгарадок  Нясята.  Арганізатары  мерапрыемства  прапануюць  жыхарам  раёна  пачаць  падрыхтоўку  і  прыняць  актыўны  ўдзел  у  конкурсах  “Сельскі  падворак”,  “Самы  прыгожы  і  смачны  каравай”,  “Кароль  сярод  гародніны”,  “Іграй,  гармонь!  Звіні,  частушка!”, “Уладар  сяла”.

“ І  ЗНОЎ  СПЯВАЕ  МОЛАДЗЬ”

Музычны    маладзёжны  фестываль  пад  такой  назвай  адбудзецца  напрыканцы  тыдня  на  галоўнай  плошчы  горада.  На  вызначанай  тэрыторыі  сустрэч  адны  маюць  унікальную  магчымасць  прадэманстраваць  свае  таленты,  а  другія — атрымаць  асалоду  ад  маладзёжнага  песеннага  мастацтва.

Аліна  СУДНІК.