Тринадцать миллионов детских жизней –
Кровавый след коричневой чумы.
Их мёртвые глазёнки с укоризной
Глядят нам в душу из могильной тьмы.
А.Молчанов

Набліжаецца Дзень памяці  юных герояў–антыфашыстаў,  які  штогод  адзначаецца  8  лютага.
Крыху  перадгісторыі.  У розныя гады ў розных краінах свету  якраз  у  гэты  дзень  адбываліся выпадкі  гібелі юных герояў:  8 лютага  1943 года  гітлераўцамі   былі  расстраляны  героі “Маладой гвардыі” Краснадона; у французскім  горадзе Бефоне  пакараны  пяцёра ліцэістаў, удзельнікаў  Супраціўлення.  8 лютага 1962 года працоўныя горада Парыжа выйшлі на антыфашысцкую дэманстрацыю. У першым радзе ішоў невысокі  пятнаццацігадовы хлопец  Даніэль Феры,  французскі  камсамолец.  Ён не чуў стрэлаў. Забіты, упаў на маставую.  Праз год, 8 лютага 1963 года, у Іракскай турме ад нечалавечых катаванняў  памёр другі хлопчык – Фадыл Джамаль, які  змагаўся з фашысцкай дыктатурай.   З таго часу   дзень  8 лютага лічыцца  Днём  памяці юных герояў-антыфашыстаў,  які  з  1963  года  адзначае  ўся  прагрэсіўная  моладзь.
А колькі  падлеткаў у гады  Другой сусветнай вайны аддалі свае  жыцці за  вызваленне роднай зямлі ад ворага!  У  гэтым  спісе – украінец  Валя Коцік, балгарын Мітко Палаузаў,  руская  Зіна Партнова, беларус Марат Казей  і  іншыя.
Сёння  ў памяці ўдзячных нашчадкаў жывуць імёны тых, хто  разам з бацькамі, старэйшымі братамі і сёстрамі са зброяй у руках  ішоў  у бой  за свабоду  Радзімы.  Сярод загінуўшых і нашы землякі – Марыя Заяц, васьмікласніца сярэдняй школы Клічава, Міхаіл Заловіч, пяцікласнік  Нова-Максімавіцкай  школы,  Алёша Галацэвіч – шасцікласнік  Бацэвіцкай школы,  і многія  іншыя.
У горадзе   Мінску  ў канцы 50-х гадоў у  Піянерскім  парку  ўстаноўлены  помнік  піянеру-герою  Марату  Казею.  Восенню  мінулага года  Цэнтральны  Савет  грамадскага аб’яднання  “Беларуская рэспубліканская піянерская  арганізацыя”  аб’явіў  рэспубліканскую  працоўную  акцыю  “Наша  піянерская  праца  табе,  Айчына”  па  зборы  другаснай  сыравіны,  прысвечаную  70-годдзю  з  дня  подзвігу  Марата  Казея.  Сродкі,  заробленыя  ў  час  акцыі,  павінны  быць  накіраваны  на  рэканструкцыю  сквера  і  помніка  піянеру-герою.  У акцыю  актыўна ўключыліся  і  піянерскія  дружыны нашага раёна.  Піянеры  СШ № 1 і СШ № 2                     г. Клічава, Бацэвіцкага  і Дзмітраўскага ВПК  «Дзіцячы  сад – сярэдняя  школа», Ганчанскага  ВПК  «Дзіцячы  сад –  базавая  школа», Запольскай,  Максімавіцкай, Нясяцкай,  Пярэкальскай  СШ,  Віркаўскай,  Усакінскай  і Усохскай  базавых школ зарабілі  і пералічылі на рэканструкцыю помніка Марату Казею 609 000 рублёў.  Акцыя працягваецца.  Я  звяртаюся  да ўсіх піянераў і дарослых, якія калісьці  былі піянерамі,  падтрымаць  гэту  добрую  справу  і  прыняць   у  ёй  актыўны ўдзел.
Зараз сярод  піянераў  і акцябрат  раёна праходзіць конкурс малюнкаў “Героі ніколі  не паміраюць. Героі  ў нашай памяці жывуць». А 8 лютага  ў  піянерскіх дружынах школ  раёна  адбудуцца  ўрачыстыя мерапрыемствы, прысвечаныя  Дню  памяці  юных  герояў – антыфашыстаў.

Надзея  Пракопчык,
метадыст   Цэнтра  дзіцячай творчасці.