Кармамі разжыцца дазволіць касавіца
Аграрыі Клічаўшчыны працягваюць нарыхтоўку кармоў з траў першага ўкосу. На ўчора ў раё­не скошана 4914га траў або 75% да плана. Нарыхтавана 27 220 тон сенажу (26%), 960 тон сена (11%), 3233 тоны сіласу (2%).
У лідарах корманарыхтоўкі – УКСП «Саўгас «ДОБРАВОЛЕЦ», дзе ўжо завяршылі работы па ўборцы траў першага ўкосу і ўчора прыступілі да касавіцы шматгадовых траў другога ўкосу.
Добрымі тэмпамі ідзе корманарыхтоўка ў ААТ «Максімавічы-Агра», дзе скошана ўжо 94% шматгадовых траў першага ўкосу, нарыхтавана 53% сенажу і 8% сена да задання.
На фінішнай прамой касавіцы сёння і аграрыі УКСП «Саўгас «Вольса» (скошана 73% траў, нарыхтавана 52% сена, 23% сенажу, а яшчэ тут назапашваюць і зернесянаж) і ААТ «Бацэвічы-АГРА» (скошана 70% траў першага ўкосу, нарыхтавана 2% сена і 13% сенажу).
Сяльчане шчыруюць ад цямна да цямна, выкарыстоўваюць кожную хвіліну, каб удосталь назапасіць кармоў для грамадскага статка на зімоўку. Гэта і самы час для людзей зарабіць ладную капейку, умовы ж спаборніцтваў загадзя распрацаваны. Ва ўсіх сельгаспрадпрыемствах для ўдзельнікаў корманарыхтоўкі наладжана і гарачае харчаванне, якое дастаўляецца прама ў поле.

Прыгажосць і ўтульнасць – агульнымі намаганнямі
Лета. Самы час добраўпарадкавання. Натуральна, што куды ні зірні ў горадзе і сяле – ідзе будоўля, рамонт, скошваецца пустазелле, каля прадпрыемстваў і ўстаноў цвітуць кветкі, зроблена азеляненне. А як шчыруюць гаспадыні на сваіх кветніках, клумбах, рабатках, каб парадаваць сябе і іншых!
Хутка цудоўнымі кветкамі будзе расквечана і цэнтральная частка вуліцы Ленінскай у Клічаве. УКП «Жылкамгас» ужо закупіў і ўстанавіў тут 5 прыгожых металічных кованых кветачніц, кожная разлічана на пяць ёмістасцей. Цяпер ідзе працэдура закупак і саміх ёмістасцей, і пасадачнага матэрыялу. Засталося пачакаць яшчэ крышку. Без сумнення, гэта будуць адны з лепшых летніх фотазон у нашым горадзе.
Прыкладаў добраўпарадкавання шмат, а ствараецца прыгажосць і ўтульнасць агульнымі намаганнямі.

Па грошы – у лес! 
Клічаўскае раённае спажывецкае таварыства пачало сезон нарыхтовак дзікарослай прадукцыі. Сёння самы хадавы тавар – ягады чарніц і грыбы лісічкі. Па словах намесніка старшыні райста Васіля РАБЦЭВІЧА, лясныя дары ў насельніцтва закупліваюць нарыхтоўчая база на станцыі Нясята, у Клічаве – магазін «Мясная лаўка», сельскія магазіны, а таксама нарыхтоўшчыкі прадпрыемства. Дарэчы, чарніцы закупліваюцца без пераборкі, бо так лепш захоўваюцца. Для арганізацыі нарыхтовак усё прадугледжана: тары дастаткова, разлік за ягады і грыбы – адразу, на месцы.
Сезон нарыхтовак стартаваў. І ў гэтай справе, як і штогод, немалая канкурэнцыя. Акрамя Клічаўскага райста, закуп грыбоў і ягад ад насельніца раёна вядуць і нямала прадпрымальнікаў.

Тэкст: Ніна ІЗОХ.