Каб было цёпла

У Клічаве працягваецца мадэрнізацыя цеплавых сетак. УКП «Жылкамгас» праводзіць планавую замену старых труб на папарэдне ізаляваныя – сучасныя ПІ-трубы. Сёлетняя задача – правесці гэтыя работы на 1193 метрах цепласетак раёна.
Як і штогод, мадэрнізацыю цеп­ласетак у летні перыяд праводзяць работнікі ўчастка «Цеплатэхніка». Як расказаў старшы майстар Сяргей МАЦЮШОНАК, у гэтыя дні яны завяршаюць свой першы сёлетні аб’ект – замену часткі цепласетак працягласцю 159 метраў у двухтрубным выкананні да будынкаў вучэбнага корпуса і практычных заняткаў дзяржаўнага аграрна-тэхнічнага каледжа. Завершаны зварачна-мантажныя работы, правялі і гідраўлічныя выпрабаванні цепласеткі пробным ціскам, на чарзе – заладка стыкаў, што таксама няпростая справа. На гэтым тыдні работы на аб’екце плануюць завяршыць. У выніку ў выйгрышы будуць усе – прадпрыемства атрымае істотную эканомію рэсурсаў, а ў навучальнай установе стане цяплей, а значыць, – больш камфортна.

Надзейнасць і безаварыйнасць – перш за ўсё

Паветраныя лініі электраперадач умоўна называюць артэрыямі энергасістэмы, дзякуючы якім і забяспечваецца надзейнае і бесперабойнае забеспячэнне электра­энергіяй спажыўцоў. Таму важна, каб знешнія фактары і анамаліі надвор’я аказвалі мінімальны ўплыў. У прыватнасці, дрэвы і кусты, што растуць у ахоўных зонах, могуць стаць прычынай пажараў і сур’ёзных пашкоджанняў высакавольтных ліній, а ўраганы і мяцеліцы часта прыводзяць да падзення дрэў, і як вынік, да пашкоджання ліній электраперадач.
Сярод прафілактычных мерапрыемстваў, якія павышаюць надзейнасць электразабеспячэння спажыўцоў, – расчыстка прасек пад паветранымі лініямі электраперадачы, вырубка небяспечных дрэў у іх зоне і прылягаючым лесе
З пачатку чэрвеня ў Клічаўскім раёне працуе служба ліній электраперадач філіяла «Бабруйскія электрычныя сеткі» РУП «Магілёўэнерга». Па словах начальніка ўчастка Васіля ГАТОЎЧЫЦА, бабруйскія спецыялісты на сваёй спецтэхніцы вядуць расчыстку і пашырэнне прасек высакавольтных ліній 110кВ Кіраўск-Клічаў і 110кВ Клічаў-ТЭЦ-2 (Бабруйск). У Клічаўскім раёне яны расчысцяць 100 га прасекі гэтай лініі ад драўнінна-хмызняковай расліннасці
Такія мерапрыемствы спрыяюць зніжэнню рызыкі ўзгаранняў і аварый на электралініях.

Лета – самы час чытаць!

На мінулым тыдні ў гарадскім парку пачаў работу бібліялетнік «Летам чытаем – нуды не ведаем»
Работнікі аддзела па абслугоўванні дзіцячага чытача правялі для рабят агляд дзіцячых выданняў, расказалі аб дзіцячых пісьменніках і пісьменніках-казачніках. На прыродзе дзеці з задавальненнем разглядвалі маляўнічыя выданні, чыталі любімыя казкі, адгадвалі загадкі і адказвалі на пытанні
Напрацягу канікул бібліялетнік запрашае ўсіх дзяцей на свае мерапрыемствы, якія будуць праходзіць па аўторках і чацвяргах (у другой палове дня) у гарадскім парку.

Тэкст: Ніна ІЗОХ.