Лес. Моладзь. Будучае.
Штогод у Клічаўскі лясгас на першае месца працы прыхо­дзяць маладыя спецыялісты – выпускнікі профільных вышэйшых і сярэдніх навучальных устаноў. Вось і сёлета ў дружны калектыў прафесіяналаў лясной галіны ўліліся памочнік ляснічага Запольскага лясніцтва Станіслаў СЯМЁНАЎ, інжынер па лесааднаўленні і меліярацыі аддзела лясной гаспадаркі Юлія БАРЛЮГОВА, майстар лесу Патоцкага лясніцтва Ангеліна САНЬКО.

З самых першых дзён працы моладзі ў лясгасе як у прафесійнай сферы, так і ў забеспячэнні ўсіх сацыяльных гарантый – падтрымка і самая пільная ўвага. Вось і нядаўна на базе Бабруйскага лясгаса прайшоў абласны семінар-нарада з маладымі спецыялістамі, якія прыбылі па размеркаванні ў дзяржаўныя лесагаспадарчыя ўстановы вобласці ў 2023 годзе. Маладых спецыялістаў пазнаёмілі з работай Грыбавецкага лясніцтва, дрэваапрацоўчага цэха «Скачок», гандлёвай пляцоўкай «Лясны домік», арганізавалі і экскурсіі па знакавых мясцінах Магілёўшчыны. Пасля адбылася дыялогавая пляцоўка пад кіраўніцтвам генеральнага дырэктара Магілёўскага ДЛГВА Сяргея МАКСІМОВІЧА.
Моладзь Клічаўскага лясгаса на сёлетнім семінары-нарадзе «Лес. Моладзь. Будучае» прадстаўляла Юлія Барлюгова.

Падарожнічаем. Пазнаём. Вывучаем.
Клічаўскія школьнікі любяць вандраваць. Толькі за першую палову лістапада ў экскурсійных паездках пабылі больш як 170 дзяцей. І гэта натуральна, бо каб ведаць і любіць сваю Радзіму, трэба пабываць у кожным яе куточку. А па-добраму здзівіць у нас сапраўды ёсць чым! Так, зборная група з школ раёна, а гэта 28 дзяцей, якія вучацца ў профільных аграрных класах, з мэтай прафесійнай арыентацыі наведалі Жыліцкі дзяржаўны сельскагаспадарчы каледж, і вядома ж, жамчужыну Магілёўшчыны – Жыліцкі палаца-паркавы комплекс, памятнік архітэктуры позняга класіцызму XVIII-XIX стагоддзяў.

Дзмітраўскія школьнікі пабывалі ў мастацкім музеі імя П.В. Масленікава, музеі гісторыі горада Магілёва і яго выставычнай зале, у якой праходзяць тэматычныя, персанальныя юбілейныя выстаўкі мастакоў, выстаўкі па выніках пленэраў і г.д.

Незабыўныя ўражанні ад экскурсіі ў Клічаўскі краязнаўчы музей і палац Булгакаў у Жылічах атрымалі навучэнцы Максімавіцкай СШ.

У найцікавейшым падарожжы ў сталіцу Беларусі – горад Мінск і Нацыянальную бібліятэку пабывалі вучні СШ №2 г. Клічава.
Ведаць аб генацыдзе народа, успомніць усё, помніць кожнага – лічуць сваім доўгам педагогі і навучэнцы Бацэвіцкай сярэдняй школы. Не так даўно мясцовыя школьнікі наведалі гістарычныя і памятныя мясціны г. Бабруйска, а таксама адно з самых трагічных месцаў у гісторыі Мінска – мемарыяльны комплекс «Яма», прысвечаны ахвярам халакоста.
У мастацкім музеі імя П.В. Масленікава, на мемарыяльным комплексе «Буйніцкае поле», мемарыяле «Памяці спаленых вёсак Магілёўскай вобласці» у вёсцы Боркі пабывалі дзеці з Нясяцкай СШ. Вось так, падарожнічаючы, дзеці пазнаюць Беларусь разам. Наперадзе – новыя вандроўкі і адкрыцці!

Тэкст: Ніна ІЗОХ.