Ветэранам працы – клопат і ўвагу
6 кастрычніка завяршылася 1-ая абласная дэкада «Залаты ўзрост», прысвечаная Міжнароднаму дню пажылых людзей. Мноства мерапрыемстваў прайшло і на Клічаўшчыне, пад час якіх ветэраны працы былі сагрэты клопатам і ўвагай.

Як заўсёды, не ў баку ад важнай справы і калектыў Клічаўскага лясгаса. Як паведаміла Святлана ЧАРЭЙЧЫК, намеснік кіраўніка па ідэалагічнай рабоце, да свята кожнаму з 103-х ветэранаў працы прадпрыемства выдзеліла даволі значную аднаразовую матэрыяльную дапамогу і салодкі падарунак – па 1,4 кг мёду з уласнай пасекі. А яшчэ ў гэтыя дні ідэолаг і старшыня прафсаюзнага камітэта наведалі колішнюю станочніцу лясгаса Соф’ю Рыгораўну СЯЎБО. Такая ўвага вельмі прыемная!

Фотачэлендж «Эпоха камсамола»
Камсамолу – 105 гадоў! Галоўнае свята восені будзем адзначаць 29 кастрычніка. У гонар яго цэнтральны камітэт ГА «БРСМ» запусціў фотачэлендж «Эпоха камсамола».

Юлія КОМАР, першы сакратар РК ГА «БРСМ»:
– Запрашаем да ўдзелу ў фотачэленджы ўсіх жадаючых. Дасылайце свае архіўныя камсамольскія фотаздымкі на электронны адрас: klc.rk@inbox.ru, дзяліцеся гісторыяй гэтых здымкаў (укажыце імя і прозвішча, год фота, мерапрыемства). Здымкі клічаўскіх камсамольцаў розных гадоў ужо можна паглядзець на старонцы «Молодёжь Могилёвщины» у Інстаграм і Тэлеграм.

Разумнікі фінансавай адукаванасці
Стартавала штогадовая рэспубліканская алімпіяда па фінансавай адукаванасці. Яе першы (школьны этап) прайшоў не так даўно, 28 верасня. У ім прынялі ўдзел 40 старшакласнікаў з усіх школ раёна.

Тыя з іх, хто набраў самую вялікую колькасць балаў з 100 магчымых, прымуць удзел у раённым этапе алімпіяды, якая пройдзе ў Клічаве 20 кастрычніка, дарэчы, як і ва ўсіх раёнах Магілёўскай вобласці.

А пасля трое пераможцаў гэтага этапа будуць прадстаўляць наш раён на абласным этапе алімпіяды, які адбудзецца 17 лістапада 2023 года ў Магілёўскім абласным інстытуце развіцця адукацыі. Пажадаем нашым разумнікам і разумніцам поспеху!

На вечар адпачынку – у рэстаран!
Амаль кожную суботу ў рэстаране «Вольса» Клічаўскага раённага спажывецкага таварыства праходзяць вечары адпачынку. Арганізуюць іх прафесіяналы – работнікі раённага Дома культуры. Таму і наведвальнікаў па выхадных шмат. Свой талент моладзі ды і сталым людзям дораць акардэаніст Валерый ПАТАЧЫЦ, салісты Аляксей САЗАНАВЕЦ, Яўгенія ТРУШКО, Аліна ПАШКОЎСКАЯ і іншыя прадстаўнікі творчага калектыву РДК. А калі гучыць у зале жывы голас і жывы гук, ёсць добрая кампанія сяброў ды адметная кухня, то і адпачынак удаецца! Тым больш, што па суботах рэстаран «Вольса» працуе да 2 гадзін ночы.

Текст: Нина ИЗОХ.