Хлеб лёгкім не бывае – вядома здаўна. Каб дзякавала ніва шчодрым ураджаем, хлебаробам трэба пашчыраваць нават не да сёмага поту. Затое якое шчасце бачыць плён сваёй працы – залатую збажыну!

У сёлетнім важкім караваі Клічаўшчыны ўклад і калектыву ААТ «Клічаўрайаграпрамтэхснаб», які апошнія два гады ўзначальвае малады энергічны кіраўнік Уладзімір СКАРАХОДАЎ. Сёння, падводзячы вынікі, можна сказаць – пашчыравалі на славу! Амаль 5 000 тон даламітавай мукі ў гэтым годзе перевёз і ўнёс у глебу ў сельгаспрадпрыемствах раёна 27-гадовы трактарыст-машыніст
Мікалай ГАРЭЛІК. Важкі яго ўклад і ў веснавой сяўбе, пад час якой і араў, і кукурузу сеяў.

Сёлета якраз 10 гадоў як Мікалай Мікалаевіч шчыруе ў сельскай гаспадарцы, амаль увесь час – у «КлічаўРАПТС». Сюды прыйшоў адразу пасля школы. Толькі адзін раз быў перапынак у працы – пад час тэрміновай службы ў арміі. Адслужыў – і зноў за клопат аб зямлі. Для Мікалая Гарэліка за добрае правіла выконваць і перавыконваць устаноўленыя нормы выпрацоўкі, а якасць работ нязменная – на «выдатна». За добрасумленную працу яго неаднаразова заахвочвалі, паважаюць таварышы па працы і кіраўніцтва сельгаспрадпрыемства. А ў гэтыя дні Мікалай Гарэлік прымае віншаванні ад родных і землякоў з нагоды важкай узнагароды – Падз­я­кі Міністэрства сельскай гаспадаркі і харчавання Рэспублікі Беларусь, якая ўручана яму пад час абласных «Дажынак-2023» у Хоцімску.

У агульным рэзультаце сельгаспрадпрыемства – уклад кожнага работніка калектыву. У ліку лепшых вадзіцеляў-тысячнікаў раёна Яўген ДОЎГІ. Жніво – штогодняя справа Сяргея МАРКАВА. У сёлетняй уборачнай кампаніі працавалі сямейным экіпажам з сынам Юрыем, які быў старшым камбайнёрам. «Молада – не зелена» – добрасумленнай працай сцвярджаў пад час жніва маладзёжны экіпаж Антона ІВАНОВА (в.а. галоўнага інжынера) і Андрэя КРАЎЧАНКІ. Кажуць сардэчнае дзякуй у калектыве не толькі ўсім сваім працаўнікам, але і Міхаілу БАЛТУШКУ, работніку УКП «Жылкамгас», які сёлетняй вясною і зараз на трактары «Беларус-3022» шчыруе на ворыве глебы. Нездарма ж народная мудрасць вучыць: «Працавітыя рукі – аснова дастатку, дабрабыту».

Тэкст: Ніна ІЗОХ.
Фота: Алена ГАНЧАРОВА.