У кожным структурным падраздзяленні сферы культуры раёна ёсць людзі, для якіх прафесія – прызванне праз жыццё.

Так і ў Лідзіі АЧЫНОВІЧ, старшага навуковага супрацоўніка Клічаўскага краязнаўчага музея.
Музейшчык – для яе і праца, і захапленне адначасова. Любімай справе аддадзена больш за 30 гадоў жыцця і зараз у раёне знойдзецца не так шмат людзей, якія б ведалі гісторыю края больш дасканала, у падзеях і асобах. Свае глыбокія веды і вопыт Лідзія Лук’янаўна перадае калегам – новай змене музейшчыкаў, і сама таксама крочыць у нагу з часам.

«Сёння Клічаўскі краязнаўчы музей – не толькі звыклы «храм мастацтва», – заўважае Лідзія Ачыновіч.– Ён з’яўляецца месцам для адкрыццяў і інавацый, дзе наведвальнікі пазнаюць штосьці новае, захапляюцца мастацтвам, гісторыяй краю, натхняюцца. Тут не збор пыльных эспанатаў і цішыня, як мяркуюць абывацелі, а бурліць жыццё. Асобная падзея года – «Ноч музеяў», адкрываюцца новыя выстаўкі, як з уласных фондаў, так і тэматычныя, камерцыйныя, праводзяцца інтэрактыўныя музейныя заняткі і лекцыі, гульні-падарожжы, якія вельмі любяць дзеці і нават дарослыя, арганізуем экскурсіі, як па экспазіцыі музея, так і выязныя. Ладзяцца і цікавыя віртуальныя выставы як уласныя, так прадастаўленыя музеямі-партнёрамі з гарадоў Бранск і Масква. Лік наведвальнікаў расце, бо музей працуе не толькі з насельніцтвам раёна, але і цесна супрацоўнічаем з гарадскімі турыстычнымі фірмамі».

У калектыве музея,які другі год узначальвае Юлія ЛЫЗО, ёсць і моладзь, сучасная, адукаваная, творчая. Так, важкі ўклад у работу музея ўносіць галоўны захавальнік фондаў Яўген СТАРАВОЙТАЎ. Другі год тут працуе і навуковы супрацоўнік Максім ЮРЧАНКА, малады спецыяліст, які патрапіў у наш музей па дзяржаўным размеркаванні пасля заканчэння Магілёўскага дзяржаўнага ўніверсітэта імя А.Куляшова. Па прафесіі ён гісторык-рэлігіязнаўца, выкладчык гісторыі і сацыяльна-гуманітарных дысцыплін. Чалавек удумлівы, грунтоўны, сур’ёзны, да справы гэтак жа ставіцца. Нездарма яму наведвальнікі ўжо пішуць падзякі за цікавыя і змястоўныя экскурсіі.

«Для мяне музей – сфера новая, але цікавая, пад час вучобы практыку праходзіў у школе, думаў, што і працаваць там буду, – шчыра расказвае Максім. – Але музей, у першую чаргу, гэта гісторыя, а яна – маё захапленне яшчэ з дзяцінства. Я з задавальненнем чытаў розныя гістарычныя кнігі, энцыклапедыі. Студэнтам удзельнічаў у археалагічных раскопках гарадзішча жалезнага веку ў Магілёўскім раёне. Працаваць у музеі мне цікава. Тут кожны дзень – новыя падзеі, новыя людзі, скрупулёзная даследчая дзейнасць».

Сёлета Клічаўскі краязнаўчы музей ужо наведалі звыш 8-мі тысяч чалавек. А вы даўно былі? Дакладна, там чакаюць адкрыцці!