Ці не ў кожным куточку Магілёўшчыны свае брэндавыя культурныя мерапрыемствы. Напрыклад, у Клічаве – «Кліч над Вольсай», Клімавічах – «Залатая пчолка», у Дрыбіне – «Дрыбінскія таржкі». А ў Чавусах – «Зялёныя святкі», міжрэгіянальнае свята-конкурс, што па традыцыі ладзіцца якраз на Тройцу. Сёлетні год не выключэнне. 8 чэрвеня на Чавускай зямлі гэты культурны фэст праходзіў ужо ў дванадцаты раз. Праводзіцца свята з мэтай адраджэння, захавання самабытнай фальклорнай культуры і традыцый рэгіёну, далучэння да роднай спадчыны моладзі.

Заўсёды «Зялёныя святкі» – гэта яркае свята, якое дазваляе ўсім у поўнай меры адчуць свае карані. Сёлета тут быў відовішчны маляўнічы конкурс карагодаў, знаёмства з народным абрадам «Кумленне». А яшчэ дзейнічала вялікая выстаўка-продаж народнай творчасці майстроў дэкаратыўна-прыкладнога мастацтва, прахо­дзілі выступленні творчых калектываў Магілёўшчыны і запрошаных гасцей свята.

У Чавускім фэсце «Зялёныя святкі» прынялі ўдзел і прадстаўнікі Клічаўшчыны – ансамбль народнай песні «Суседзі» Бацэвіцкага сельскага Дома культуры і Клічаўскі раённы Дом рамёстваў. Прыехалі на свята-конкурс не з пустымі рукамі, а з сапраўднай творчай скарбонкай. Таму і ўразілі, і па-добраму здзівілі журы і гледачоў. Да дому нашы землякі прывезлі… 8 дыпломаў!

Клічаўскі раённы Дом рамёстваў стаў пераможцам, узнагароджаны дыпломам I ступені ў конкурсе традыцыйных траецкіх пачастункаў, дыпломам III ступені конкурса «Лепшая траецкая лялька»!
Дыпломамі свята-конкурсу адзначаны калектыў «Суседзі» у намінацыі «Лепшы карагод», і ўсе майстры народных мастацкіх рамёстваў – Лізавета КАВАЛЁВА, Наталля ЛАПАЦІНА, Дзмітрый ШАМЫНА і Уладзімір ДЗЯРЖАНСКІ.

– Быць у ліку лепшых у міжрэгіянальным свяце-конкурсе «Зялёныя святкі» для нас гонар і новая творчая вяршыня, – адзначае загадчыца РДР Лізавета Кавалёва. – Гэта было зусім няпроста, бо якіх толькі рукатворных цудаў не было тут! Мы ж прадставілі на конкурс лялек не асобныя вырабы,
а дзве кампазіцыі – «Траецкая «Лялька-вяночніца» ­­ і «Сястрыца-Тройца». Пастараліся зрабіць іх як мага маляўніча, з усімі атрыбутамі народнага свята – рознымі раслінамі, зёлкамі і кветкамі, лістотай бярозы, арэлямі. Працавалі над іх стварэннем усім калектывам, а яшчэ нам дапамагалі члены аматарскіх аб’яднанняў РДР Жана ШЫДЛОЎСКАЯ і Святлана ЖДАНОЎСКАЯ. Калектыўная праца –
і ўсе нашы конкурсныя трацыйныя траецкія пачастункі, набор страў, якія рыхтавалі на гэта свята даўней, па сямейных рэцэптах нашага рэгіёну: пірагі з гароднінай, сырам, рыбай, салодкія –
з тварагом і цукатамі, зялёныя фарбаваныя яйкі, усе стравы ўпрыгожвалі рознай зелянінай. Увогуле, папрацавалі творча, крэатыўна, з фантазіяй. Рады, што атрымалі такую высокую ацэнку журы свята-конкурсу.

Віншуем творчыя калектывы Клічаўшчыны з дасягненнямі! Няхай і надалей у спадарожніках будуць натхненне і поспех!

Тэкст: Ніна ІЗОХ.