Сёння ў раёне статус рамеснікаў маюць 75 чалавек – гэта вялізная сіла, якая робіць наша жыццё больш зручным, камфортным, расквечвае будні і святы. Іх вырабы ручной работы – вынік аўтарскай фантазіі і майстэрства. Добрая частка рамеснікаў згуртавана вакол раённага Дома рамёстваў, калектыў якога адраджае і перадае дзецям і дарослым сакрэты старажытных промыслаў і рамёстваў краю. Ён крочыць у нагу з часам, у гушчы падзей культурнага жыцця рэгіёну і міжнароднага супрацоўніцтва.
У прыватнасці, народныя майстры і рамеснікі Клічаўскага, Быхаўскага, Слаўгарадскага раёнаў аб’яднаны ў рэгіянальнай ініцыятыве «Мабільная школа аўтарскага майстэрства» праекта «Сеткавае ўзаемадзеянне для паляпшэння магчымасцей занятасці ў сельскіх раёнах Магілёўскай вобласці», які фінансуецца Еўрапейскім Саюзам. Гэта ініцыятыва садзейнічае больш эфектыўнай занятасці рамеснікаў, аказвае істотную дапамогу ім у продажы сваіх вырабаў.

«Майстар – майстру» – такой падпраграмай аб’яднаны сёння рамеснікі Клічаўскага і Быхаўскага раёнаў. Майстар-класы для дарослых тут праводзяць як метадысты-майстры раённых Дамоў рамёстваў, так і вопытныя рамеснікі.
Клічаўскі раённы Дом рамё ст ваўтворчая лабараторыя. Тут нара джаюцца новыя ідэі, новыя таленты – і, вядома ж, прыгожыя вырабы, нямала якіх можна аднесці да прадметаў мастацтва.
Гэтым летам калектыў раённага Дома рамёстваў правёў шмат майстар-класаў і для дзяцей, якія наведвалі лагеры адпачынку. Многія з іх зараз ужо ў ліку юных гурткоўцаў РДР.

Як расказала дырэктар раённага Дома рамёстваў Таццяна ФЕДАСЕЕНКАВА, сёння ўстанова запрашае на заняткі ў дзіцячыя гурткі па жывапісе, мастацкай апрацоўцы керамікі, лозапляценні, саломапляценні.
Дарослых чакаюць у гуртку па саломапляценні, аматарскіх аб’яднаннях па жывапісе і мастацкай апрацоўцы драўніны.
Свет творчасці кліча!

Матэрыялы падрыхтавала Ніна ІЗОХ