У мінулую суботу, 31 мая, Клічаў зноў гасцінна сустракаў удзельнікаў рэгіянальнага фестывалю традыцыйных культур малых гарадоў «Кліч над Вольсай» – аднаго з самых яркіх і доўгачаканых культурных падзей рэгіёну.

Свята на Цэнтральнай плошчы горада бурліла з самай раніцы. Фестываль абяцаў быць адметным, багатым на таленты і творчыя адкрыцці, на цёплыя сяброўскія сустрэчы аднадумцаў – людзей улюбёных у народную спадчыну. А ў сёлетнім фестывалі ўдзельнічалі прадстаўнікі творчых калектываў Магілёўскай і Гомельскай абласцей, а таксама Дарагабужскага і Шумячскага раёнаў Расіі.

Яшчэ да ўрачыстага адкрыцця фестывалю, на плошчы працавала мноства тэматычных пляцовак. Адна з іх – «Клічаў. ART», якая прапаноўвала майстар-класы па дэкаратыўна-прыкладному мастацтву. Уражвала ўнікальнасцю, прыгажосцю, размахам выстаўка-продаж вырабаў традыцыйных рамёстваў удзельнікаў фестывалю «Горад майстроў». Кожны тут знаходзіў для сябе штосьці па душы. Ды і што можа быць лепшым за падарунак для блізкіх ці сувенір на памяць аб фестывалі, чым выраб, што захоўвае цеплыню рук творцы? Людзі з цікавасцю глядзелі майстр-класы, што праводзілі майстры народнай творчасці. Напрыклад, Вольга ВАСІЛЬЕВА з Шумяч, што на Смаленшчыне, па­дзялілася сакрэтамі пляцення на драўлянай вілачцы.

– Рамяство гэта яшчэ ад старажытных славян. Я па прафесіі бухгалтар, а пляценне – адно з маіх хобі. З’яўляюся ўдзельнікам смаленскага гістарычнага клуба «Вытокі», глыбока і сур’ёзна вывучаем гісторыю, робім рэканструкцыю быту, адзення славян, скандзінаваў. Наша спецыфіка – крывічы,
10-11 стагоддзе. Я і апранута зараз у народны касцюм Смаленскага павета таго часу.
На фестывалі ў Клічаве не ўпершыню. Прыязджаем, бо ў нас ужо моцныя творчыя сувязі з клічаўлянамі, штогод на фестывалі новыя ўдзельнікі, дзелімся вопытам, знаёмім з культурай свайго роднага краю, мноства ўражанняў, прыемна, што сучаснікі цікавяцца спадчынай, – расказала Вольга Уладзіміраўна.

Свае наведвальнікі на кожнай тэматычнай пляцоўцы: «Літаратурнае сузор’е Клічаўшчыны» цэнтральнай бібліятэкі, «Бацькоўскія скарбы» краязнаўчага музея, на выстаўцы-продажы сувенірнай прадукцыі РЦСАН. Раздольна і цікава на свяце і дзятве. На вясёлую спартыўна-забаўляльную праграму рабят усіх узростаў сабраў Цэнтр дадатковай адукацыі дзяцей і моладзі. Нямала гасцей склікала і прэзентацыя традыцыйных напіткаў «Асалода». Быў наладжаны і гандаль, дзе можна было купіць дзіцячыя цацкі, сувеніры, прадукты харчавання і іншае.

На двары было цёпла і сонечна, таму людзі актыўна набывалі розныя прысмакі ў павільёнах Клічаўскага раённага спажывецкага таварыства, тыя ж гарачыя шашлыкі з дымком, свежую выпечку ад кафе «Паўлінка» каледжа, адпачывалі ў вулічным кафэ. Сёлетні год – год 80-годдзя Вялікай Перамогі. Перш чым адкрыць фестываль, яго ўдзельнікі ўшанавалі памяць воінаў і партызан, якія змагаліся і перамаглі ворага ў гады Вялікай Айчыннай вайны, усклалі кветкі да памятнага знака на Цэнтральнай плошчы Клічава.

І вось гучаць фанфары ўрачыстага адкрыцця фестывалю «Кліч над Вольсай». Сустракаем гасцей! Адзін за другім па плошчы ідуць творчыя дэлегацыі Гомельскага раёна, гарадоў Дарагабуж і Шумячы з Расіі, з суседніх Кіраўска, Глуска, Асіповічаў і нашы землякі – народны вакальны ансамбль «Крыніца» і Заслужаны аматарскі калектыў Рэспублікі Беларусь народный ансамбль народнай музыкі і песні «Жытніца». Сімвал фестывалю – Кліч, адроджаны з легенды, гукам сігнальнага рога адкрывае фестываль!

«Кліч над Вольсай» з кожным годам пашырае сваю геаграфію і запальвае новыя зоркі. Вось і сёлета ўпершыню ў фестывалі ўдзельнічае творчая дэлегацыя з Гомельшчыны! Новая адметнасць сёлетняга фэсту – адкрыццё карты геаграфіі фестывалю «Кліч над Вольсай». Прадстаўнікі творчых дэлегацый абазначаюць на ёй свой удзел у гэтым форуме мастацтва.

Удзельнікаў і гледачоў фестывалю сардэчна вітае намеснік старшыні райвыканкама Галіна ДАНІЛКІНА:
«Мы рады ўжо ў чацвёрты раз прымаць на Клічаўскай зямлі ўдзельнікаў фестывалю «Кліч над Вольсай»! Наш фестываль працягвае добрую традыцыю развіцця ўмацавання культурных сувязяў, абмену духоўнымі і культурнымі каштоўнасцямі, папулярызуе творчасць», – падкрэсліла Галіна Пятроўна. І пажадала фестывалю доб­рага шляху.

Лепшыя пажаданні фестывалю, міру, згоды і дабра пажадаў усім і настаяцель Дабравешчанскага храма пратаіерэй Сергій АНДРЭЕЎ.

Фестываль «Кліч над Вольсай» – гэта заўсёды россып талентаў, песні, музыка, танцы. Праграму «Гарэзлівы млын» з песняй «Клічаў-гарадок» адкрывае Заслужаны калектыў «Жытніца». І пачынаецца чароўная дзея! Па плошчы закружыў вялізны карагод, а гэта больш, чым танец. Гэта сімвал еднасці і сімвал дружбы. Усе сышліся ў карагодзе, узяўшыся за рукі ў знак нашых агульных традыцый, культуры, гісторыі і народных каштоўнасцяў. А песня – душа народа. Над Клічавам, над усёй зямлёй гучаць, разліваюцца народныя песні, то меладычныя, то жартоўныя, сумныя і вясёлыя, як само жыццё. Іх гледачам дораць, змяняючы на сцэне адзін другога, творчыя калектывы – удзельнікі фестывалю – ансамбль народнай песні і музыкі «Гамонка» Гомельскага раёна, народны вакальны ансамбль «Крынічанька» з Глуска, вакальная група «Задорынка» (пасёлак Шумячы), вакальны ансамбль «Алёнушка» (г. Дарагабуж»), нашы землякі – народны вакальны ансамбль «Крыніца», ансамбль «Родныя напевы» (г. Кіраўск), Заслужаны аматарскі калектыў Рэспублікі Беларусь народны ансамбль народнай песні «Вязанка» (г. Асіповічы).

І вось прыйшоў час знаёміцца з гісторыяй народнага касцюма. Таму асобая старонка фестывалю – «Крос­ны». Самабытную калекцыю этнаграфічных касцюмаў свайго рэгіёну прадстаўляюць на фестывальнай сцэне калектывы з Асіповічаў, пасёлка Шумячы, г. Дарагабужа. А затым усіх закружыў у сваёй віхуры народны перапляс! Артысты з асіповіцкай «Вязанкі», гомельскай «Гамонкі», ансамбля «Старапляс» з Дарагабужа запрасілі ўсіх у «Клічаўскі карагод»! І ўжо ўсе разам развучвалі, танчылі «Польку-бабачку», «Суботу», вясельны танец «Печанае парася», «Падэспань», «Ойру» і мноства іншых танцаў! І вось заключныя акорды фестывалю. Удзельнікаў свята вітае, шчыра дзякуе ім загадчык сектарам культуры райвыканкама Анастасія ШАЛАЙ і запрашае ўсіх прыняць удзел у юбілейным, пятым фестывалі будучага года «Кліч над Вольсай-2026».

Урачыста, па-добрасуседску цёпла і сардэчна прайшлі ўрачыстасці ўзнагароджвання ўдзельнікаў фестывалю. Гучалі словы падзякі, найлепшых пажаданняў, арганізатары і ўдзельнікі абменьваліся памятнымі падарункамі, і было зразумела – фестываль прайшоў на высокім узроўні, міжнародным творчым сувязям толькі мацнець! Адзін з арганізатараў фестывалю «Кліч над Вольсай» Уладзімір ВААКС выказаў агульную думку: «Наш фестываль аб’ядноўвае, дапамагае захаваць самабытнасць народнай культуры малых гарадоў. Пажадаем яму і яго ўдзельнікам творчых поспехаў і адкрыццяў, новых гарызонтаў. Няхай «Кліч над Вольсай» развіваецца, пашырае свае межы, прыцягвае ўсё больш таленавітых удзельнікаў і зацікаўленых гледачоў!»

Тэкст і фота: Ніна ІЗОХ.