Гэта цікавая гісторыя пачалася з наміткі, якую фалькларысты ўбачылі некалькі гадоў таму ў музеі Запольскай школы. Рэч была вельмі паношаная і падобная на рушнік.

Каб разабрацца, мы звярнуліся да кандыдата мастацтвазнаўства НАН Беларусі Марыі Мікалаеўны ВІННІКАВАЙ. Аказалася, што цікавая знаходка – сапраўды намітка, старажытны традыцыйны жаночы галаўны ўбор усходніх славян, які насілі замужнія жанчыны ў нашай Беларусі, Літве, паўднёвых абласцях Расіі і Украіне. Пачаліся паходы ў Клічаўскі краязнаўчы музей, у фондах якога аказалася яшчэ некалькі намітак. Некаторыя з іх былі не толькі з Клічаўскага раёна, а нават з Брэсцкай вобласці.

Марыю Мікалаеўну зацікавіла наша намітка з вёскі Пярэкаль, бо на ёй, акрамя вышыўкі па краях, быў вышыты налобнік. Навуковец паабяцала зрабіць расшыфроўку наміткі і даведацца аб спосабе яе нашэння. Мы са свайго боку таксама зрабілі даследванні і даслалі іх у Мінск. Праз некаторы час Марыя Мікалаеўна пераслала нам спосаб завязвання гэтай наміткі, зрабіўшы аналіз іншых гэткіх жа галаўных убораў. Аказалася, што менавіта так намітку насілі ў Чэрвеньскім раёне ў вёсцы Зайцы.
Маючы такія цікавыя вынікі, мы вырашылі сумесна з Клічаўскім краязнаўчым музеем правесці для старшакласнікаў “Падарожжа ў мінулае”. Старшы навуковы супрацоўнік музея Лідзія АЧЫНОВІЧ расказала пра традыцыйныя строі, якія бытавалі на тэрыторыі Беларусі. Творчыя работнікі раённага Дома культуры Жана АЧЫНОВІЧ і Тамара АСТРОЎСКАЯ паказалі дзецям майстар-клас па завязванні галаўных жаночых убораў, як гэта некалі было ў нашых вёсках.

Дзеці пазнаёміліся з асаблівасцямі нашэння хустак у дарослым калядным абрадзе «Цыганы», дзіцячым абрадзе «Куры» (Віркаў, Нясята, Дзмітраўка), асаблівасцямі паўсядзённага нашэння хустак у нашай мясцовасці. А ўдзельніца народнага вакальнага ансамбля «Крыніца» Зоя САМЕЦ паказала, як завязвалі жанчыны хусткі менавіта ў сенакос.

На гэтым мерапрыемстве дзеці даведаліся шмат цікавага: як раней можна было дакладна адрозніць дзяўчыну ад замужняй жанчыны, калі забаранялася і дазвалялася нашэнне галаўных убораў, пазнаёміліся з некаторымі абрадамі традыцыйнага народнага календара.
А самым цікавым, вядома ж, было завязванне наміткі. Дзяўчаткам вельмі хацелася прымераць гэты не­звычайны старажытны ўбор. Яны прыбіраліся ў гэтыя галаўныя жаночыя ўборы, фатаграфаліся.
Напрыканцы заняткаў дзяўчаты і хлопцы з задавальненнем паўдзельнічалі ў майстар-класе па традыцыйных танцах «Падыспань» і «Кракавяк», які правялі ўдзельніцы народнага вакальнага ансамблю «Крыніца».
Завочнае падарожжа ў мінулае захапіла ўсіх удзельнікаў мерапрыемства. Яно для сённяшніх старшакласнікаў аказалася цікавым, і нават захапляльным, дапамагло ім пазнаёміцца з сваёй спадчынай, судакрануцца з сваімі каранямі.

Тэкст: Жана АЧЫНОВІЧ,
загадчык аддзела нестацыянарнага абслугоўвання насельніцтва РДК.