Да 80-годдзя вызвалення Клічаўшчыны

У краязнаўчым музеі адкрыўся новы раздзел экспазіцыі, прысвечаны вызваленню Клічаўскага раёна ад нямецка-фашысцкіх захопнікаў у 1944 годзе. У яго аснову леглі новыя факты аб тых важных гістарычных падзеях і новыя імёны герояў вызвалення, якія сталі вядомыя дзякуючы даследчай рабоце, праведзенай навуковымі супрацоўнікамі музея.

Сімвалічна, што першымі з новым раздзелам экспазіцыі пазнаёміліся навучэнцы аграрна-тэхнічнага каледжа, бо менавіта маладым трэба будзе не толькі захоўваць і берагчы нашу гісторыю, але і перадаць памяць аб гераічным мінулым народа з пакалення ў пакаленне.

Час, калі дзень год корміць

Яшчэ 13 красавіка ў раёне завершана сяўба ранніх яравых збожжавых і зернебабовых культур. Гэты яравы клін заняў у цэлым 1076 гектараў.

– Сёння паўсямесна ў сельгаспрадпрыемствах Клічаўшчыны закладваюць аснову надзейнай кармавой базы для жывёлагадоўлі, – адзначае Уладзімір СКАРАХОДАЎ, першы намеснік начальніка ўпраўлення па сельскай гаспадарцы і харчаванні райвыканкама. – У першую чаргу, патрэбна стварыць значны запас кармоў, багатых на бялок. Толькі так не будзе праблем з кармамі для грамадскага статка. Таму пашыраем пасяўныя плошчы бялковых культур. Так, калі ў 2022 годзе ў раёне было ўбрана 420 га соі, летась – 813 га, то сёлета будзем сеяць 895 га гэтай бабовай культуры.
586 га, значна больш леташняга, гэтай вясной пасеялі гаспадаркі раёна і ранніх зернебабовых культур, пераважна – віка-аўсяную сумесь. Атрыманы ўраджай гэтых высокабялковых культур пойдзе на прыгатаванне ўласных канцэнтраваных кармоў для буйнай рагатай жывёлы, у тым ліку, каб замяніць імпарт.

Маем і 3000 га азімага рапсу, які перазімаваў нядрэнна. Гэтай вясной пасевы ўжо двойчы падкормлены мінеральнымі ўгнаеннямі, пратручаны ад пустазелля, шкоднікаў і хвароб. Для ўзмацнення кармавой базы для жывёлагадоўлі ў гэтыя дні нашы сельскагаспадарчыя прадпрыемствы сеюць і яравы рапс. Такія работы ідуць зараз у дзяржаўных прадпрыемствах «Тэльмана» і «Будзёнага», а таксама ў ААТ «Нясята-АГРА», ААТ «Максімавічы-Агра», ААТ «Бацэвічы-АГРА».

Прыступілі аграрыі раёна і да сяўбы кукурузы. Плануецца, што яна сёлета займе 9650 га, з іх 2500 га прызначаюцца на збожжа, астатняе – на корм жывёле. Кукурузу зараз сеюць ва УКСП «ДАБРАВОЛЕЦ», а таксама дзяржаўным прадпрыемстве «Будзёнага», УКСП «Доўгаўскі». Насенне гэтай культуры – як айчыннай селекцыі, так імпартныя гібрыды, у залежнасці ад фінансавых магчымасцяў сельгаспрадпрыемстваў.

Тэкст: Ніна Ізох.