Увага – веснавой сяўбе
На мінулым тыдні адбылося пасяджэнне райвыканкама, на якім было разгледжана пытанне гатоўнасці сельгаспрадпрыемстваў раёна да вясенне-палявых работ. У пасяджэнні пад кіраўніцтвам старшыні Клічаўскага райвыканкама Віктара РЭБКАЎЦА ўдзельнічалі: упраўляючы справамі Магілёўскага аблвыканкама Мікалай ДЗЯДКОЎ, раённая вертыкаль улады, кіраўнікі арганізацый і прадпрыемстваў Клічаўшчыны і іншыя зацікаўленыя.

Асноўным дакладчыкам па азначанай тэме выступіў начальнік упраўлення па сельскай гаспадарцы і харчаванні райвыканкама Віталь СІТА.

Сумесна з кіраўнікамі сельгаспрадпрыемстваў Віктар Рэбкавец і Мікалай Дзядкоў абмеркавалі праблемныя пытанні і шляхі іх вырашэння.

Нашы шахматысты лепшыя ў вобласці!
Каманда Клічаўскага раёна заняла 1-е месца ў абласным спартыўна-масавым мерапрыемстве «Фестываль школьнага спорту» па шахматах сярод юнакоў і дзяўчат 2009 года нараджэння і маладзей.

Гонар раёна на гэтых спаборніцтвах адстойвалі вучні ДУА «Максімавіцкая сярэдняя школа Клічаўскага раёна»: Арцём КІРПЛЮК, Данііл КАРНЕЙЧЫК, Юлія СОТНІКАВА і Дарья КРАСЬКО (настаўнік фізічнай культуры Міхаіл САЛАДУХА), якія і сталі лепшымі з лепшых сярод юных шахматыстаў Магілёўшчыны. Ёсць і асабістыя важкія дасягненні: Данііл Карнейчык, які займаецца ў аб’яднанні па інтарэсах «Шахматы» у Яўгенія КАРОТКАГА, заняў 2-е месца ў асабістым заліку сярод юнакоў.

Віншуем з перамогай максімавіцкіх шахматыстаў і іх педагогаў! Малайцы, так трымаць!

Новая тэхніка паступае ў гаспадаркі Клічаўшчыны
Дзяржава падтрымлівае тэхнічнае пераўзбраенне гаспадарак. Штогод за сродкі абласнога бюджэту
абнаўляцца машынна-трактарны парк сельгаспрадпрыемстваў Клічаўшчыны. У гэтыя дні новая тэхніка пачала паступаць адразу ў тры з іх. Так, яшчэ да пачатку веснавой сяўбы ў ААТ
«Бацэвічы-АГРА» паступяць культыватар і самаходны апрысквальнік «Раса», у ААТ «Нясята-АГРА» – энерганасычаны трактар «Беларус-3522» і самаходны апрысквальнік «Раса». Самае значнае паступленне новай тэхнікі ў ААТ «Коўбча-АГРА»: энерганасычаны трактар «Беларус-3522», 9-корпусны плуг, культыватар і самаходны апрысквальнік «Раса».

Ёсць добрыя кадры, сучасная тэхніка – будзе і рэзультат.

Тэкст: Ніна ІЗОХ.