Жыццё,  прысвечанае  небу…

ВАГАНАЎ Іван Іванавіч
Генерал-маёр авіяцыі
Ганаровы грамадзянін гарадскога пасёлка Клічаў  (1995г.)

Генерал-маёр  Іван Іванавіч  ВАГАНАЎ,  лётчыкі-касманаўты  Віталій  Іванавіч
СЕВАСЦЬЯНАЎ  і  Уладзімір  Аляксандравіч  ШАТАЛАЎ  (злева  направа).
Здымак  (1970-я  гады)  з  фонду  раённага  музея.

Іван Іванавіч   Ваганаў нарадзіўся 9 лістапада 1922 года  ў Клічаве. Тут прайшло дзяцінства, школьныя гады, тут скончыў дзесяцігодку.   У 1940 годзе па пуцёўцы мясцовага РК ЛКСМБ быў накіраваны ў Маскоўскае авіяцыйнае вучылішча.
1 мая 1941 года ўдзельнічаў у першамайскім ваенным парадзе на Краснай плошчы. У гады Вялікай Айчыннай вайны прымаў удзел у баявых дзеяннях. З верасня 1941 па май 1945 года ваяваў на Сталінградскім і Бранскім франтах, вызваляў Прыбалтыку.
Пасля Перамогі вучыўся ў Маскоўскай ваеннай акадэміі. Кіраваў авіяцыйнымі часцямі.
З 1957 па 1960 гады служыў на тэрыторыі Беларусі  – у Пінску, Калінкаві-чах. З 1960 года – працаваў у Маскве.
Іван Іванавіч быў адным з удзель-нікаў работы па асваенні касмічнай прасторы, сябраваў з Юрыем Гагарыным, адзін з кіраўнікоў Цэнтра падрыхтоўкі   касманаўтаў у Зорным гарадку. З’яўляўся  членам Ваеннага савета Паветранай арміі. Быў начальнікам палітаддзела цэнтра падрыхтоўкі касманаўтаў імя Ю.А.Гагарына, загадчыкам мемарыяльнага музея акадэміка С.П. Каралёва. Жыў у Маскве.
Узнагароджаны трыма ордэнамі Чырвонай Зоркі, ордэнамі Айчыннай вайны І ступені, “За службу Радзіме ва  Узброеных Сілах” ІІІ ступені, 21 медалём, дыпломам і медалём імя  Ю. А. Гагарына.
У 1975 годзе за ўдзел у падрыхтоўцы і  паспяховае правядзенне сумеснага палёту савецкіх і амерыканскіх касманаўтаў на караблі “Саюз — Апалон” Ваганаў І. І. быў узнагароджаны дыпломам амерыканскай Асацыяцыі астранаўтыкі.
У 1995 годзе ўдастоены звання “Ганаровы грамадзянін гарадскога пасёлка Клічаў”.

Марыя  Талкачова,
бібліёграф  аддзела  абслугоўвання  і  інфармацыі  цэнтральнай  бібліятэкі.