Перасоўны ФАП запатрабаваны

З 8 студзеня гэтага года ў раёне пачаў работу перасоўны фельчарска-акушэрскі пункт УЗ «Клічаўская цэнтральная раённая бальніца». У яго зоне абслугоўвання сельскія населеныя пункты, што адносяцца да Віркаўскага, Востраўскага, Ядрана Слабодскага і Ганчанскага ФАПаў, з агульнай колькасцю насельніцтва больш за 600 чалавек. Працуе перасоўны ФАП штодня, у адпаведнасці з графікам, з 8.00 да 15.30. Фельчар Валерыя ФЕШЧАНКА праводзіць прыём насельніцтва амбулаторна і на даму, здзяйсняе патранаж дзяцей да 3-х гадоў, праводзіць пярвічны агляд пацыентаў, пры неабходнасці выдае накіраванні да ўрача і г.д.

Перасоўны комплекс абсталяваны ўсім неабходным для правядзення лячэбных працэдур, аказання неадкладнай даўрачэбнай дапамогі, правядзення дыспансерызацыі, забору аналізаў, у тым ліку гінекалагічных. Пацыенты, а гэта жыхары аддаленых вёсак, такімі медыцынскімі паслугамі задаволены, бо яны – па месцы жыхарства, а гэта зручна.

Арыенцір – поспехі дзяцей

У абласным цэнтры творчасці прайшоў калядны турнір па робататэхніцы, які сабраў юныя таленты з розных рэгіёнаў Прыдняпроўя. Зарадзіўся ён толькі летась, а сёлета ў ім было ўжо амаль удвая больш каманд-удзельніц – аж 32! Гэты від тэхнічнай творчасці любяць і клічаўскія дзеці, якія з задавальненнем займаюцца ў аб’яднанні па інтарэсах «Робататэхніка» ДУДА «Клічаўскі цэнтр дадатковай адукацыі дзяцей і моладзі» у Яўгеніі Сяргееўны НЕСЦЯРЭНКА. Вядома, юным удзельнікам не ўсё даецца хутка і проста. Іншы раз трэба і добра пастарацца, справа ж даволі складаная. Вось і ў гэтым турніры для кожнага віду спаборніцтва патрэбны былі спецыяльныя камп’ютарныя праграмы. Але нашы дзеці былі на вышыні, іх поспехі радуюць!
У выніку спаборніцтваў каляднага турніру дыпломам II ступені ў намінацыі «Робосумо» (8-10 гадоў) узнагароджаны Міхаіл МІХНЁНАК і Кірыл ОСІПАЎ, дыпломам III ступені ў намінацыі «Кегельринг» (8-10 гадоў) – Арцём ХАРЛАП і Іван АЎЧЫННІКАЎ.
Малайцы! Жадаем новых поспехаў!

Арганіку – на палеткі

Студзень у палову ўвабраўся, на двары то мароз цісне, то адліга, а аграрыі Клічаўшчыны ў клопатах аб веснавой сяўбе 2024 года. Кожнаму вядома, што без добрай запраўкі глебы мінеральнымі і арганічнымі ўгнаеннямі, нельга атрымаць высокі ўраджай любой культуры. Таму зараз адзін з надзённых клопатаў – вывазка арганікі на палеткі. Паводле інфармацыі ўпраўлення па сельскай гаспадарцы і харчаванні райвыканкама, па стане на раніцу 15 студзеня ў раёне на палеткі вывезена 102 172 тоны арганічных угнаенняў (73% да задання).

Вялізныя аб’ёмы работ, кіпіць праца ва УКСП «Саўгас «ДАБРАВОЛЕЦ», дзе ад запланаваных 34 600 тон арганічных угнаенняў на палеткі вывезена ўжо 90%.

Хуткімі тэмпамі вядуцца гэтыя работы ў ААТ «Клічаўрайаграпрамтэхснаб» (план вывазкі арганікі выкананы на 108%), ААТ «Нясята-АГРА» – 96%, УКСП «Саўгас «Ольса» – 77%, ААТ «Максімавічы-Агра» – 75%.

Тэкст: Ніна ІЗОХ.