На гэтым тыдні Святлана Шутава, дэпутат палаты прадстаўнікоў Нацыянальнага сходу Рэспублікі Беларусь па Асіповіцкай выбарчай акрузе № 89, правяла у нашым раёне чарговы прыём грамадзян па асабістых пытаннях, наведала адзін з двароў у мікрараёне шматпавярховых забудоў і краязнаўчы музей.
Прадстаўнікі жыхароў вуліцы Зарэчнай звярнуліся да парламентарыя з набалелым пытаннем, якое датычыцца забеспячэння іх мікрараёна стацыянарным магазінам крокавай даступнасці. Паколькі гэта праблема ўздымаецца выбаршчыкамі не першы год, то на прыёме прысутнічала Наталля Бурлакова, начальнік аддзела эканомікі райвыканкама. У прысутнасці дэпутата Наталля Уладзіміраўна падрабязна пракаменціравала ход вырашэння ўздымаемай праблемы.
Клічаўлянку Ніну Мікалаеўну С. непакоіць факт налічэнняў камунальных плацяжоў на зарэгістраванага, але не пражываючага на яе жылплошчы ўнука. Нягледзячы на тое, што Андрэй Мацюшонак, дырэктар УКП «Жылкамгас», даў уладальніцы кватэры вычарпальны адказ, Святлана Аляксандраўна палічыла мэта-згодным узняць пытанне налічэння плацяжоў на асвятленне і ўборку месцаў агульнага карыстання па колькасці зарэгістраваных, але не пражываючых у кватэры жыхароў, на пасяджэннях адпаведнай дэпутацкай камісіі і Савета Міністраў.
Дарэчы, паколькі ўзнятыя наведвальнікамі пытанні хвалююць многіх жыхароў, то каментарыі спецыялістаў мы апублікуем у наступным нумары нашай газеты.
У краязнаўчым музеі Святлана Аляксанд- раўна з задавальненнем пазнаёмілася з экспазіцыямі ўсіх 9 залаў, а потым падзякавала дырэктару ўстановы Наталлі Храмянковай за змястоўную экскурсію, пацікавілася праблемамі, якія патрабуюць неадкладнага вырашэння.
Аліна Суднік.
Фота аўтара.