Магазін у аграгарадку Коўбча належыць раённаму спажывецкаму таварыству і працуе ў адпаведнасці з графікам. Ажыятажу няма, у асноўным насельніцтва наведваецца сюды, каб папоўніць прыпасы, набыць свежыя прадукты. 
У памяшканні чыста і ўтульна, тавару шмат і ўвесь ён раскладзены па групах. Круглы год – свежая садавіна і гародніна, фрукты, некалькі найменняў хлебабулачных вырабаў, мноства мясных, кандытарскіх, рыбных прысмакаў.
Ёсць секцыя прамысловых тавараў. Дарэчы, габарытныя тавары, як, напрыклад, тэлевізар, халадзільнік, гіпсакартон і таму падобнае, вяскоўцы набываюць па папярэдняй заяўцы з дастаўкай дадому.
– Наша Юля Васільеўна вельмі сціплы і ўраўнаважаны чалавек. Прыемна зайсці ў магазін, яна заўсёды ветлівая і ўважлівая, – нахвальвае прадаўца 83-гадовая Софія Васільеўна Дубіна.
І ёй можна давяраць. Тым больш што толькі добрыя водгукі пачула і ад іншых вяскоўцаў. А гэта красамоўна сведчыць, што Юлія Васільеўна Белая на сваім месцы і працу сваю любіць. Дарэчы, кожны дзень ездзіць сюды з вёскі Каменны Барок, што на Бярэзіншчыне. Пэўны час яна адна працавала ў магазіне, а днямі на падмогу ёй выйшла Крысціна Кудлоўская. Цяпер мясцовыя кааператары працуюць без перапынку на выхадны.
Мінуў той час, калі магазін у аграгарадку быў адзінай гандлёвай кропкай. Сёння канкурэнцыю кааператарам складае магазін індывідуальнага прадпрымальніка Марыны Аляксееўны Несцяровіч. Былая выхавацельніца пасля аптымізацыі дзіцячага садка знайшла справу па душы і не прагадала. Гандлёвая кропка для яе не проста бізнес, а жыццёва важны сацыяльны фактар. Затое канкурэнты імкнуцца выкарыстоўваць новыя фарматы, асартымент фарміруюць у адпаведнасці з попытам і магчымасцямі пакупнікоў.
Аліна СУДНІК. 
Фота аўтара.